2018-ci il mayın 7-də Türkiyənin İstanbul şəhərində yerləşən İstanbul Aydın Universitetində EURAS, İstanbul Aydın Universiteti və Xəzər Universitetinin birgə təşkilatçılığı ilə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının 70 illik yubileyinə həsr edilmiş “Hamlet İsaxanlının əsərləri səsləndirilir” adlı ədəbi-bədii gecə keçirildi. Gecədə Azərbaycan Respublikasının xalq artistləri Azər Zeynalov, Brilyant Dadaşova, Gülyanaq Məmmədova, əməkdar artistlər Səbinə Verdiyeva, gənc vokalistlər Gülşən İbadova və Atəş Qarayevin ifasında Hamlet İsaxanlının sözlərinə yazılmış mahnılar və Xəzər Universiteti “Dünya” məktəbinin müəllimləri Elşad Rzayev, Arzu Ömərova, Mədinə Karahan və Afaq Qəmbərovanın hazırladığı ədəbi-bədii proqram tamaşaçılar tərəfindən alqışlarla qarşılandı.

Saz ustası Cahangir Quluyevin H.İsaxanlının şeirlərinə bəstələdiyi və ifa etdiyi yeni mahnılar tamaşaçılar tərəfindən böyük marağa səbəb oldu. Mədəniyyət və incəsənət departamentinin müdiri Zülfiyyə Sadıqovanın rəhbərlik etdiyi Kamera Orkestrinin səsləndirdiyi canlı ifalar alqışlarla qarşılandı. Uzun sürən bədii gecənin sonunda İstanbul Aydın Universitetinin prorektoru professor Orhun Canpolat yubilyarı səhnəyə dəvət etdi. O.Canpolat EURAS və İstanbul Aydın Universiteti adından Hamlet İsaxanlını doğum günü münasibətilə təbrik etdi və ona hədiyyə təqdim etdi. Sonda Hamlet İsaxanlı bütün qonaqlara və təşkilatçılara təşəkkürünü bildirdi və şeirlərini oxudu. Həmin gün axşam Xəzər Universiteti adından proqramda iştirak edən qonaqlar, dostlar və iştirakçılar üçün ziyafət məclisi təşkil edildi. Ziyafətdə Koç Universiteti, İstanbul Aydın Universiteti, İstanbul Yıldız Teknik Universiteti, Kahraman Maraş Sütçü İmam Üniversiteti, İstanbul Üniversiteti, Mərmərə Universiteti və digər universitetlərdən gələn elm adamları iştirak etdilər. Ziyafət məclisində iştirak edən qonaqlar Hamlet İsaxanlının şərəfinə xoş sözlər söylədilər...

İstanbul Aydın Universitetindəki yubiley tədbirində iştirak edən heyət Atatürk Hava Limanından Bakıya dönməli idi. Lakin məlum olmayan səbəblərdən təyyarənin bir müddət gecikəcəyi haqqında anons verildi. Gecə saat on idi. Hər kəs yorğun görünürdü. Kamera Orkestrinin üzvləri ilə birlikdə musiqili flaşmob göstərilməsinə qərar verildi. Kamera Orkestrinin bir qrup üzvlərinin iştirakı ilə səsləndirilən ölməz bəstəkarımız Üzeyir Hacıbəylinin “Arazbarı”sı Atatürk Hava Limanını bürüdü. Gözləmə salonunda sərnişinlər və orada çalışanlar musiqili flaşmobu ayaq üstündə sürəkli alqışlarla qarşıladılar. Atatürk Hava Limanında səsləndilən musiqili flaşmob sosial şəbəkələrdə böyük marağa səbəb oldu.