2018-ci il mayın 8-də Xəzər Universiteti Humanitar və sosial elmlər fakültəsinin regionşünaslıq ixtisasının 1-ci il tələbələri fakültənin dekanı dosent Cabir Xəlilov, dekan müavini Validə Kərimova, Siyasi elm və beynəlxalq münasibətlər departamentinin koordinatoru Elmar Mustafayev və həmin departamentin müəllimi Gülşən Kəngərlinskaya ilə birgə onun tədris etdiyi “Avropa mədəniyyəti və incəsənəti” fənnini Azərbaycan və dünyanın nadir tarixi-mədəniyyət abidə kompleksi olan Qobustan Dövlət Tarixi-Bədii Qoruğunda keçdi.

Açıq dərsin orada keçirilməsinin məqsədi fakültənin birinci kurs regionşünaslıq ixtisasının tələbələrinin dünyagörüşü, tarixi bilikləri və Azərbaycanın maddi-mədəni irsi ilə bilavasitə tanışlığını təmin etmək idi. Fakültənin tələbələrinə Böyükdaş dağında qədim mağaralar, qayaüstü təsvirlər, ibtidai insanın ocaq və yaşayış yeri, landşaftın özünəməxsusluğu göstərildi, daha sonra isə xüsusi olaraq, yeni yaradılmış interaktiv muzeydə bələdçi tərəfindən dünya və Azərbaycanın petroqlifləri, onların öyrənilməsi və coğrafiyası, bölgənin qədim iqlimi və landşaftı, fauna və florası, ibtidai insanın fəaliyyəti və həyat tərzi haqqında geniş ekskursiya təşkil olundu.

Azərbaycanın arxeoloji inkişafı tarixi və maddi-mədəni irsinin öyrənilməsi üçün bu dərs çox əhəmiyyətli idi.