2018-ci il aprelin 26-da Xəzər Universitetinin Karyera Mərkəzinin təşəbbüsü ilə “Maliyyə və mühasibatlıq sahəsində karyera inkişafı” adlı seminar keçirildi. Seminarın keçirilməsində məqsəd Xəzər Universitetində maliyyə və mühasibatlıq üzrə bakalavr təhsili alan tələbələrin fərdi və peşəkar inkişafı üçün karyera planlamasının önəmi və onun təşkili prinsiplərinin idarə olunmasına nail olunması idi.

Headstart International şirkətinin Biznesin inkişafı üzrə meneceri İbrahim Osmanov maliyyə və mühasibatlıq sahəsində karyera qurmaq istəyən gənclərin karyera planlamasında diqqət etməli olduğu məqamlar, əmək bazarındakı rəqabət şəraitində gənc kadrların digərlərindən fərqlənməsi və üstünlüyə nail olunması üçün fərdi inkişaf planları haqqında ətraflı məlumat verdi.

Seminarda milli və beynəlxalq mühasibatlıq seçiminin şəxslərin karyeralarında edə biləcəyi dəyişiklər və perspektivə təsir mexanizminə adi mövzulara da toxunuldu.

Headstart International şirkətinin ACCA üzrə Keyfiyyətə Nəzarət Meneceri Elvin İbrahimov ACCA kvalifikasiyasının maliyyə və mühasibatlıq sahəsində karyera qurmaq istəyən gənclərə önəmi mövzusunda iştirakçılarla interaktiv müzakirə apardı. Bundan əlavə, tələbələrin maliyyə və mühasibatlıq sahəsində şəxsi inkişafları üçün zəruri olan beynəlxalq kvalifikasiyanın modulları barədə şirkət əməkdaşı iştirakçıları məlumatlandırdı.

Qeyd edək ki, 100 ildən artıq tarixi olan, mühasibatlıq, maliyyə və idarəetmə sahəsində uğurlu karyera qurmaq istəyənlər üçün yüksək səviyyəli kvalifikasiya hesab olunan ACCA dünyanın 181 ölkəsində tanınır, 486 min tələbə və 200 mindən çox üzvə malikdir.

Sonda, seminar iştirakçıları məruzəçilərə maraqlandıqları mövzular barədə suallar ünvanlayaraq və maliyyə-mühasibatlıq sahəsində gələcək karyeraları üçün geniş məlumat əldə etdilər.