2018-ci il aprelin 23-ü və 24-də Xəzər Universiteti Lylublyana Universitetinin İqtisadiyyat fakültəsinin (FELU) nümayəndələrini qəbul etdi. Səfərin ilk günü qonaqlara Azərbaycanın mədəniyyəti və tarixi ilə tanışlıq proqramı təşkil edildi. Bu məqsədlə qonaqlar Qobustan dövlət tarixi-bədii qoruğuna səfər etdilər.

Aprelin 24-də müsafirlər Xəzər Universitetinin “Neftçilər” kampusunda həyata keçirilən proqramda iştirak etdilər. Həmçinin, universitetin təsisçisi, Direktorlar və Qəyyumlar Şurasının sədri professor Hamlet İsaxanlı qonaqlarla görüşdü.

FELU-nun nümayəndə heyətinə Beynəlxalq əlaqələr şöbəsinin direktoru Danijela Voljc, Beynəlxalq əlaqələr ofisinin nümayəndəsi Klavdija Besednjak, Keyfiyyətin Təminatı Ofisinin rəhbəri Smiljana Zajec, Marketinq şöbəsinin direktoru Tanja Gvozdenovic, Mühasibatlıq şöbəsinin rəhbəri Dusan Jerse və Xəzər Universitetinin İngilis dili və ədəbiyyatı departamentində bir neçə mühazirə oxuyan İqtisadiyyat fakültəsinin Biznes ingilis dili fənni üzrə mühazirəçisi Zenja Kansky-Rozman daxil idilər.

Xəzər Universitetini isə Akademik işlər üzrə prorektoru professor Məhəmməd Nuriyev, İqtisadiyyat və menecment fakültəsinin dekanı dr. Ceyhun Məmmədov, İqtisadiyyat və menecment fakültəsinin dekan müavini Dr. Şəhriyar Muxtarov, İqtisadiyyat və menecment fakültəsinin müəllimi Dr. Elvin Məmmədov, İqtisadiyyat və menecment fakültəsinin müəllimi Dr. Bahadır Baysal, İnkişaf Mərkəzinin direkoru Raziyə İsayeva, Beynəlxalq əlaqələr şöbəsinin direktoru Turan Cəfərova təmsil edirdilər.

Xəzər Universiteti FELU ilə əməkdaşlığa 2015-ci ildə Erasmus+ proqramının tərkibi olan Beynəlxalq Kredit Mobilliyi çərçivəsində başlamışdır. O zamandan etibarən əməkdaşlıq daxilində Xəzər Universitetinin İqtisadiyyat və menecment fakültəsinin beş tələbəsi proqramdan faydalanmışlar. Onlardan hər biri FELU-da bir semestr təhsil almışlar. Hazırda Xəzər Universitetinin üç tələbəsi FELU-da bir semesterlik mübadilə proqramının iştirakçısıdır.