2018-ci il aprelin 20-də Xəzər Universiteti Təhsil fakültəsi Azərbaycan dili və ədəbiyyatı departamentinin müəllimi Qardaşxan Əzizxanlının təşəbbüsü ilə Qazax rayonunda III “Məmməd Araz poeziya günü”nün açılışı oldu.

Azərbaycan Respublikası Prezidenti yanında Bilik Fondunun, Azərbaycan Yazıçılar Birliyinin (AYB) təşkilatçılığı və Qazax rayon İcra Hakimiyyətinin dəstəyi ilə Gənclər Mərkəzində keçirilən tədbir xalq şairinin öz ifasında səslənən şeirinin oxunması ilə başladı. Sonra Qazax rayon İcra Hakimiyyətinin başçısı Rəcəb Babaşov tədbir iştirakçılarını salamladı.

AYB Qazax zona filialının sədri Barat Vüsal və "Məmməd Araz poeziya günü” layihəsinin rəhbəri Qardaşxan Əzizxanlı Məmməd Araz yaradıcılığının Azərbaycan ədəbiyyatındakı rolundan söz açdı. Layihə rəhbəri bildirdi ki, aprelin 20-dən etibarən Qazaxdan başlayan poeziya günləri ölkəmizin müxtəlif şəhərlərində davam edəcək.

Tədbirdə əməkdar artislərdən Nuriyyə Hüseynova və İlkin Əhmədov, aşıqlardan Camoy Qurbanov və Yaşar Gülümcanov şairin şeirlərinə həsr olunmuş mahnılar oxudular.

“Məmməd Araz poeziya müsabiqəsi”nin qalibi olmuş məktəblilərin çıxışları zamanı şairin “Azərbaycan – dünyam mənim” və “Qalx ayağa, Azərbaycan” şeirlərinin ifaçılarını tədbir iştirakçıları ayaq üstə, alqışlarla qarşıladılar.

Tədbirin sonunda müsabiqə qaliblərinə Azərbaycan Respublikası Prezidenti yanında Bilik Fondu tərəfindən təsis edilmiş diplomlar və hədiyyələr təqdim edildi.