2018-ci il aprelin 20-21-də Xəzər Universitetində universitetin təsisçisi, Direktorlar və Qəyyumlar Şurasının sədri professor Hamlet İsaxanlının yubileyinə həsr olunan “Qloballaşan təhsil” adlı beynəlxalq simpozium keçirildi.
Sinpoziumda Azərbaycan (Xəzər Universiteti, ADA Universiteti, Azərbaycan Respublikası Təhsil İnstitutu, ADİU, ADPU, ADU, ATU, ADMİU, BSU,BMU, Gəncə Dövlət Universiteti, Mingəçevir şəhərindəki 7 saylı məktəb, Bakı şəhərindəki 126 saylı tam orta məktəb), Türkiyə (Çankaya Universiteti, Eskişehir Osmanqazi Universiteti, Qazi Universiteti, “Khan Academy”), Macarıstan (Debrecen Universiteti), Finlandiya (İyvaskyla universiteti), Albaniya (New York Tirana Universiteti) və Avstriyadan (Vyana Tətbiqi Elmlər Universiteti) olan alim və mütəxəssislər iştirak edirdilər.
Konfransdan əvvəl iştirakçılara Xəzər Universiteti Kamera orkestrinin ifasında qısa musiqi proqramı təqdim olundu.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı konfransı açaraq, iştirakçıları salamladı, konfransın əhəmiyyətindən danışdı və işinə uğurlar arzuladı.
New York Tirana Universitetinin rektoru professor Fatoş Tarifa, Çankaya Universitetinin professoru Buket Akkoyunlu və digərləri də çıxış edərək, konfrasın Bakıda, yaxşı tanıdıqları Xəzər Universitetində keçirilməsindən məmnunluq duyduqlarını bildirdilər.
Açılış mərasimindən sonra və aprelin 21-də simpozium işini səkkiz bölmədə davam etdirdi. Bölmələrə ADİU-dan professor Zahid Məmmədov, Natiq Hacıyev, ADPU-dan Bilal Həsənov, Oktay Alxasov, Xəzər Universitetindən Lyudmila Sotova, Mələk Kərimova və Debrecen Universitetindən Peter Forisek sədrlik edirdilər. Bölmələrdə 40-dan artıq məruzə dinlənilərək, müzakirələr aparıldı və suallar cavablandırıldı.
Aprelin 21-də bağlanış mərasimində bölmələrin sədrləri və həmsədrlərindən Ayhan Aydın (Eskişehir Osmanqazi Universiteti), Bilal Həsənov və Məlahət Abdullayeva (ADPU), Ülkər Bayramova və Mələk Kərimova (Xəzər Universiteti) və Peter Forişek (Debrecen Universiteti) məlumat verərək, dinlənilmiş məruzələrin elmi səviyyəsinin əsasən yüksək olduğunu və fəal müzakirələr aparıldığını bildirdilər.
Bağlanış mərasimində Xəzər Universitetinin Tədris işləri üzrə prorektoru professor Məhəmməd Nuriyev çıxış edərək, konfransın işini yekunlaşdırdı və simpoziumun hazırlanıb keçirilməsində əməyi olanlara və iştirakçılara minnətdarlığını bildirdi.
New York Tirana Universitetinin rektoru professor Fatoş Tarifa simpoziumun yüksək səviyyədə təşkil olunduğuna görə Xəzər universitetinin rəhbərliyinə təşəkkür etdi.
Simpozium iştirakçılarına sertifikat təqdim olundu.
Xarici iştirakçılar üçün Bakı ətrafına ekskursiya təşkil edildi.