2018-ci il aprelin 20-də Xəzər Universitetinin Mərkəz kampusundakı “Dünya” konsert salonunda universitetin təsisçisi, Direktorlar və Qəyyumlar Şurasının sədri professor Hamlet İsaxanlının yubileyinə həsr olunmuş “Xəzər”in sorağında” adlı ədəbi-bədii tədbir keçirildi.
Tədbirdə universitetin rəhbərliyi və əməkdaları, tələbələr, həmin gün Xəzər Universitetində açılışı olmuş “Qloballaşan təhsil” adlı beynəlxalq simpoziuma gəlmiş yerli və xarici mütəxəssislər iştirak edirdilər.
İştirakçılara AzTV-nin əməkdaşı Faizə Mehdiyevanın rejissorluğu ilə hazırlanmış Aparıcı – Film-monoloq – Səhnə tamaşası – Musiqi komponentlərindən ibarət çoxplanlı və maraqlı ədəbi-bədii kompozisiya təqdim olundu. Aparıcı İctimai TV-nin aparıcısı Məhəmməd Əli idi.
Kompozisiya Hamlet İsaxanlının həyatı haqqında qısa məlumatla başlayaraq, əsasən onun Xəzər Universitetini qurmaq yolunda respublikanın Nazirlər Kabineti ilə apardığı gərgin danışıqları və bunun Baş nazir Həsən Həsənovun universitetin təsisinə icazə verən tarixi imzası ilə sona çatdığını əks etdirirdi. Tamaşada rolları Xəzər Universitetinin əməkdaşları Mail Yaqub (Həsən Həsənov) və Qoşqar Məhərrəmov (iqtisad elmləri doktoru Saleh Məmmədov), Azərbaycan Dövlət Gənc Tamaşaçılar Teatrının aktyoru Təbriz Əmrahlı (Nazirlər Kabineti nəzdində İqtisadiyyatın İdarə Edilməsi İnstitutunun rektoru Rəhim Rəhimov) və aktyor Nicat Əli (Hamlet İsaxanlı) ifa edirdilər.
Hamlet İsaxanlının sözlərinə yazılmış mahnıları Xəzər Universitetinin Musiqi və incəsənət departamentinin müdiri, əməkdar müəllim Zülfiyyə Sadıqovanın pianoda müşayiəti ilə Müslüm Maqomayev adına Azərbaycan Dövlət Akademik Filarmoniyasının solisti, Xəzər Universitetinin müəllimi Məhsəti Cabbarova (“Yadındamı”, bəstəkar Cavanşir Quliyev) və M. F. Axundov adına Azərbaycan Dövlət Akademik Opera və Balet Teatrının solisti, əməkdar artist Fərid Əliyev (“Qədim sual”, bəstəkar Dilarə Qulamova), Xəzər Universitetinin himnini isə həmin müşayiətlə universitetin tələbələrindən ibarət xor kollektivi ifa etdilər.
Sonda səhnəyə dəvət olunan Hamlet İsaxanlını iştirakçılar alqışlarla qarşılayıb, yubileyi münasibətilə təbrik etdilər. H. İsaxanlı ədəbi-bədii tədbiri hazırlayanlara və iştirakçılara təşəkkürünü bildirdi.