2018-ci il aprelin 19-də Belçika Krallığının Fövqəladə və Səlahiyyətli səfiri zati-aliləri cənab Bert Schoofs Xəzər Univerisiteti Siyasi elm və beynəlxalq münasibətlər departamentinin dəvəti ilə universitetin qonağı oldu. Cənab səfir assistenti Sevil Qəhrəmanovanın müşayiətilə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Xəzər Universitetinin rektoru Dr. Hassan Niknafs və Siyasi elm və beynəlxalq münasibətlər departamentinin koordinatoru Elmar Mustafayevlə görüşdü.

Görüşdə Xəzər Universitetinin tarixi, ixtisaslar, tədqiqat imkanları və universitetinin beynəlxalq əlaqələri haqqında məlumat verildi. Eyni zamanda, tələbə və kadr mübadiləsi üzrə qarşılıqlı əməkdaşlıq imkanları, Xəzər Universiteti ilə Belçika ali təhsil müəssisələri arasında ikitərəfli proqramların hazırlanması və birgə tədqiqatların aparılması müzakirə olundu.

Öz növbəsində, cənab Schoofs Belçika ali təhsil müəssisələri ilə Xəzər Universiteti arasındakı münasibətlərin qurulmasında məmnuniyyətlə iştirak etməyə hazır olduğunu bildirdi. Səfir Siyasi elm və beynəlxalq münasibətlər departamentinin tələbələri üçün xüsusi seminar təqdim etmək üçün edilən dəvəti müsbət qiymətləndirdi.