2018-ci il martın 29-da Xəzər Universitetində Humanitar və sosial elmlər fakültəsinin dekanı, hüquq üzrə fəlsəfə doktoru, dosent Cabir Xəlilovun 60 illik yubileyi münasibətilə tədbir keçirildi. Tədbirdə universitetin rəhbərliyi, dekanlar və departament müdirləri, əməkdaşlar iştirak edirdilər.

Universitetin məzunlarla iş bölməsinin müdiri Baba Bayramlının aparıcılıq etdiyi tədbirdə İdarəetmə və tələbə işləri üzrə prorektor İsaxan İsaxanlı çıxış edərək, C. Xəlilovun universitetdəki uzunmüddətli fəaliyyətini yüksək qiymətləndirdi, yubilyara təbrik məktubunu və gül dəstəsi təqdim etdi.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, universitetin rektoru Hassan Niknafs, Tədris işləri üzrə prorektor Məhəmməd Nuriyev, Humanitar və sosial elmlər fakültəsinin dekan müavini Validə Kərimova, İngilis dili və ədəbiyyatı departamentinin müəllimləri Firəngiz Nəsirova və Kəmalə Əsgərova, Magistratura, doktorantura və elmi işlər bölməsinin müdiri Eldar Şahgəldiyev, Təhsil fakültəsinin dekanı Elza Səmədova, İctimai əlaqələr və media üzrə direktor Əlövsət Əmirbəyli, Siyasi elm və beynəlxalq münasibətlər departamentinin koordinatoru Elmar Mustafayev çıxış edərək, yubilyar haqqında xoş sözlər söylədilər, onun pedaqoq və təhsil rəhbəri kimi fəaliyyətini yüksək dəyərləndirdilər.

Sonda Cabir Xəlilov çıxış edərək, yubiley tədbirinin təşkilinə görə universitet rəhbərliyinə və iştirakçılara təşəkkürünü bildirdi.

Tədbirin bədii hissəsində Xəzər Universitetinin Kamera orkestri, Roman Azaflı aşıq havaları və Təhsil fakültəsinin tələbəsi Şəmsiyyə Cəfərova bəstəkar mahnıları ilə çıxış etdilər.