2018-ci il martın 22-də yenicə yaradılmış Cəlilabad Poeziya klubu Beynəlxalq Poeziya günü münasibətilə Novruz bayramı günlərində Azərbaycan Yazıçılar Birliyi (AYB) Lənkəran filialının qonağı oldu. Tədbir iştirakçılarını AYB Lənkəran filialının təmsilçisi Ağamir Cavad salamladı. Sonra “Bu yaz bir başqa yazdır...” devizi altında keçirilən görüşün ideya müəllifi Xəzər Universitetinin müəllimi Qardaşxan Əzizxanlı tədbirin məqsədi barədə danışdı. O bildirdi ki, qarşıdan respublikanın ictimai-siyasi həyatında çox mühüm rol oynayacaq prezident seçkiləri və dövlət səviyyəsində qeyd ediləcək möhtəşəm yubileylər gəlir. Bu ab-hava regionların ədəbi mühitində də hiss olunmalıdır.

Cəlilabad Poeziya klubunun sədri istedadlı şair Əlizadə Nuri, mətbuat katibi filologiya üzrə fəlsəfə doktoru Bilal Alarlı, poeziya məsələləri üzrə katib Əlirza Həsrət, ev sahiblərindən yazıçı Qafar Cəfərli, şair İslam Rzayev, həmçinin, tədbirə qatılmış tanınmış şairlər Balayar Sadiq, riyaziyyat üzrə fəlsəfə doktoru Əlişirin Şükürlü və başqaları çıxış edərək, poeziyanın nəzəri məsələlərinə toxundular, yeni şeirlərini oxudular.

Tədbirin sonunda C.Cabbarlı adına Lənkəran musiqi məktəbinin müəllimləri tarzən Əbülfəz Əhmədovun müşaiyətilə xanəndə İmanverdi Ağayevin ifasında muğam və xalq mahnıları səsləndi.