2018-ci il martın 14-də Xəzər Universitetinin komandası tədris və təlim strategiyasının inkişafı ilə bağlı ERASMUS+ PETRA layihəsi çərçivəsində təlim keçirdi. Təlimin əsas məqsədi Azərbaycanın yeddi universitetinə baş çəkməklə, onların tədris və təlim strategiyasını inkişaf etdirmək idi. Təlim layihənin vəzifələri, məqsədləri və nəticələrinin yenidən nəzərdən keçirilməsi ilə başladı. Daha sonra tədris və təlimdə mükəmməlik konseptinin müzakirəsi ilə davam etdi. Təlimin son 2 saatı ərzində nümayəndələr hər bir universitetin tədris və təlimdə zəif və güclü tərəflərini analiz etdilər. Onların tədris və təlim üçün yaratdıqları şəraiti, eləcə də, sözü gedən layihənin hər bir universitet daxilində reallaşdırılması dövründə rastlaşacağı maneələri müzakirə edərək, nəzərə çatdırdılar. Hər bir tərəfdaş universitetin tədris və təlimə dair yeni strategiyasını təqdim və müzakirə etməsi üçün PETRA layihəsi çərçivəsində növbəti yerli görüşün aprelin 12-də Xəzər Universitetində keçirilməsi barədə razılığa gəlindi.

Təhsil Nazirliyinin nümayəndələri görüşdə aktiv iştirak etdilər və layihənin həyata keçirilməsi ilə bağlı fikirlərini bölüşdülər.