2018-ci il martın 5-dən 9-dək PETRA layihəsi çərçivəsində Avstriya bfi Vyana Tətbiqi Elmlər Universitetində üçüncü təlim keçirildi. PETRA Avropa Birliyinin Erasmus+ Proqramı ilə birgə yaradılmış “Azərbaycan Universitetlərində Tədris və Təlimin Təkmilləşdirilməsi” layihəsidir. Xəzər Universitetinin beş nümayəndəsi – universitetin Elmi işlər üzrə prorektoru dosent İradə Xəlilova, Təhsil fakültəsinin dekanı Dr. Elza Səmədova, Keyfiyyətin Təminatı Mərkəzinin direktoru Lyudmila Sotova, İnkişaf Mərkəzinin direktoru Raziyə İsayeva və Humanitar və sosial elmlər fakültəsinin dekan müavini Validə Kərimova təlimdə iştirak edirdilər.
Elmi tədqiqatların təkmilləşdirilməsinə (WP5) həsr edilən təlim bir sıra mövzuları əhatə edirdi. Təlimin birinci günü İradə Xəlilova “Azərbaycanda elmi tədqiqatlar və inkişaf” mövzusunda təqdimatla çıxış etdi. Daha sonra Dr. Dietmar Paier “Avstriyada Tədqiqat və İnkişaf (R&D)” haqqında təqdimat etdi. 5 günlük intensiv təlim proqramı Avstriyada tədqiqatın maliyyələşdirilməsi, AB-nin Horizon-2020 layihəsində iştirak, layihələrin idarə edilməsi, keyfiyyətin idarə edilməsi, universitetlərin beynəlmiləlləşməsi kimi mövzuları əhatə edirdi. Təlimin son iki günü Azərbaycanda tədqiqat və inkişaf (R&D) imkanlarının artırılması və universitetlər daxilində layihələrin icra olunması mövzusunda seminarlar keçirildi. Universitetin nümayəndələri təlimdə fəal iştirak edərək, müxtəlif ideyalar üzrə təqdimatlar keçirdilər.