2018-ci il martın 6-da Xəzər Universitetinin əcnəbi tələbələri və Beynəlxalq Əlaqələr Şöbəsinin nümayəndəsi Təhsil Nazirliyinin təşkilatçılığı ilə Gəncə şəhərində Azərbaycan universitetlərindən olan əcnəbi tələbələr üçün təşkil olunmuş tədbirdə iştirak etdilər.
Tədbirdə Təhsil nazirinin müavini Firudin Qurbanov, Gəncə Şəhər İcra Hakimiyyəti başçısının birinci müavini Elnur Rzayev, ictimaiyyət nümayəndələri, KİV təmsilçiləri, ali təhsil müəssisələrinin nümayəndələri və əcnəbi tələbələr iştirak edirdilər. Xəzər Universitetini Beynəlxalq Əlaqələr Şöbəsinin assistenti Elxan Kasimov və universitetdə təhsil alan Zimbabve və Nigeriyadan olan əcnəbi tələbələr təmsil edirdilər. Öncə tədbir iştirakçıları Azərbaycan Dövlət Aqrar Universitetində Azərbaycan Xalq Cümhuriyyəti güşəsi ilə tanış oldular. Daha sonra Azərbaycan Dövlət Aqrar Universitetində təşkil olunan tədbirdə tarix elmləri doktoru, professor Solmaz Rüstəmova-Tohidinin “Milli kimlik sualından milli dövlətçiliyə: müstəqilliyin çətin yolu” adlı mühazirəsi dinlənildi. Mühazirədə əsasən Azərbaycan Xalq Cümhuriyyətinin tarixindən bəhs olunurdu.
Mühazirədən sonra qonaqlar Gəncə şəhərinin bir çox görməli yerlərini ziyarət etdilər. Əcnəbi tələbələr əsasən Gəncədə yerləşən Şah Abbas məscidi, Cavad xan türbəsi, Çökək hamam, Gəncə Dövlət Filarmoniyası ilə tanış oldular. Görüşün sonunda əcnəbi tələbələr Azərbaycan şairi olan Nizami Gəncəvinin məqbərəsi ziyarət etdilər və onun haqqında geniş məlumatı dinlədilər.