2018-ci il martın 1-də 1 Mart – Ümumdünya Mülki Müdafiə Gününə həsr edilmiş tədbir keçirildi. Tədbirdə universitetin Elmi işlər üzrə prorektoru dosent İradə Xəlilova, müəllim və tələbələri iştirak edirdilər. Xəzər Universitetinin əməkdaşı və ehtiyatda olan polkovnik-leytenant Mais Talışxanov tədbiri açıq elan etdi və Xocalı Soyqırımında həlak olanların xatirəsi 1 dəqiqəlik sükut ilə yad edildi. O, tələbələrə mülki müdafiənin əhəmiyyəti, vəzifələri, əhalinin fövqəladə hallara qarşı necə hazır olmasının yolları haqqında ümumi məlumat verdi. Bundan sonra tədbiri aparmaq üçün söz universitetin tələbələri Bahar Babayeva və Aynurə Möhsünlüyə verildi. Təhsil fakültəsinin tələbəsi Natəvan Əhmədova Beynəlxalq Mülki Müdafiə Təşkilatının yaranma tarixi və inkşaf yolu, Azərbaycanın bu təşkilatda rolu barədə məlumatı tədbir iştrakçılarına təqdim etdi.

1 Mart – Ümumdünya Mülki Müdafiə Günü hər il bir mövzuya həsr edilir. Bu il isə tədbir 3-cü kurs tələbəsi Nərmin Məmmədovanın hazırladığı “Mülki müdafiə və milli qurumlar tərəfindən FH-nin effektiv idarə olunması” mövzusunda təqdimatı ilə davam etdirildi. Tədbirdə videotəqdimat materiallarının hazırlanması tələbə Nurlanə Cəfərzadə tərəfindən edilmişdi. İqtisadiyyat və menecment fakültəsinin tətələbəsi Elmir Quliyev fövqəladə hallarda xilasetmə işlərinə aid olan ilk tibbi yardım zamanı insanlara süni tənəffüsün verilməsi və ürəyin qapalı masajının edilməsi qaydalarını nümayiş etdirdi. Bundan sonra tədbir iştirakçılarına “Azərbaycan Respublikasında fövqəladə hallar və mülki müdafiə hazırlığı” haqqında videofilm nümayiş etdirildi.

Tədbirdə Xəzər Universitetinin əməkdaşı, FHK üzvü Baba Bayramlı çıxış etdi, tələbələrə fövqəladə hallarda hazırlıq, xəbərdarlıq yolları haqqında məlumatlar verdi və onların suallarını cavablandırdı.