Fevralın 24-25-də ABŞ-ın Azərbaycandakı səfirliyinin dəstəyi ilə YLP`13 Proqram məzunu Samirə Qasımova və FLEX`15 proqram məzunu Elmir Muxtarovun təşkil etdikləri Amerika Birləşmiş Ştatları Senatının Modeli (MUSS) konfransı keçirildi. “Nüvə təhdidi: Şimali Koreya” mövzusunda simulyasiya konfransında iştirak üçün 50 ştatı təmsil edən 50 iştirakçı seçilmişdi. Xəzər Universiteti Karyera mərkəzinin meneceri Səbinə Allahverənova konfransda Demokratlar Partiyasının senatoru rolunda çıxış etdi.

İki gün ərzində “senator”lar məruzə sessiyalarına qatılaraq, müzakirələr apardılar. Öz ştatlarından seçilmiş senatoru mümkün qədər dəqiq təsvir etdilər.

Amerika Birləşmiş Ştatları Senatının Modeli ABŞ Senatının qanunvericilik prosesini simulyasiya etmək üçün bir platformadır. Bu proqram Amerika Birləşmiş Ştatları hökumətindəki qanunvericilik prosesinə dair iştirakçıların anlayışlarını yaxşılaşdırmaq və onların siyasi iştirakını təşviq etmək üçün bir proqramdır.