2018-ci il fevralın 20-də Azərbaycan Milli Elmlər Akademiyasında (AMEA) İctimai Elmlər Bölməsinin və Elm Tarixi İnstitutunun birgə təşkilatçılığı ilə “Azərbaycan Xalq Cümhuriyyəti: Tarixi retrospektivlik və müasirlik” mövzusunda elmi konfrans keçirildi. Konfransda Xəzər Universitetinin Tarix və arxeologiya departamentinin müəllimi tarix üzrə fəlsəfə doktoru Ziyad Əmrahov “Azərbaycan Xalq Cümhuriyyəti dövründə digər millətlərə münasibət” mövzusunda məruzə ilə çıxış etdi.
Konfransın plenar iclasında çıxış edən natiq Cənubi Qafqazdakı coğrafi mövqeyi və tarixi inkişaf xüsusiyyətlərinə görə Azərbaycanın ən qədim zamanlardan müxtəlif xalqların birgəyaşayışı üçün əlverişli ölkə olduğu, hətta Azərbaycan Xalq Cümhuriyyətinin İstiqlaliyyət Bəyannaməsində insan hüquq və azadlıqlarına hörmətlə yanaşılması, ölkə ərazisində bütün millətlərə sərbəst şəkildə geniş bir meydan verdiyi, dövlət quruculuğu, xarici siyasət məsələlərində Azərbaycan Xalq Cümhuriyyəti istər parlamenti, istərsə də hökuməti formalaşdırarkən digər millətlərin nümayəndələrini də unutmadığı konfrans iştirakçılarının diqqətinə çatdırdı.