2018-ci il fevralın 20-dən 22-dək Xəzər Universiteti İnkişaf Mərkəzinin direktoru Raziyə İsayeva tələbə cəlbi haqqında araşdırması ilə bağlı tanışlıq ziyarətilə Şotlandiya universitetlərində və sparqs təşkilatında oldu. O, Dandi Universitetində təşkil edilmiş nümayəndəliklərin görüşündə iştirak etdi və təqdimat keçirdi.

Fevralın 21-də R.İsayeva sparqs (Şotlandiyada Keyfiyyətin Təminatı üzrə Tələbə Tərəfdaşlıqları) direktoru İv Lyuislə görüşmək və apardığı tədqiqatla əlaqədar söhbət etmək üçün təşkilata baş çəkdi. Həmin gün o, tələbə birliyi nümayəndələri –Edinburq Universiteti Tələbə Birliyində Təmsilçilik və Demokratiya üzrə meneceri Al Pauel və Təhsil və Məktəblər üzrə ofisin məsul şəxsi Meqan Braun ilə görüşmək üçün Edinburq Universitetini də ziyarət etdi. Onlar tələbə birliyi binalarını tanıdıb onun tarixi və funksiyaları haqqında danışdılar və tədqiqatın cavab axtardığı bir çox digər sualları müzakirə etdilər.

Fevralın 22-də o, Stirlinq Universitetinə baş çəkərək, tələbə birliyi nümayəndəlikləri – Demokratiya və Araşdırmalar üzrə koordinator Emi Eberlik, tələbə birliyi prezidenti Astrid Smollenbrok və Təhsil üzrə vitse-prezident Met Adi ilə görüşdü. Onlar tələbə cəlb edilməsi ilə bağlı bir çox sualları, bu işin həm tələbə, həm də universitet üçün müsbət nəticələrini, eləcə də, tədqiqatın mövzusundan irəli gələn digər məsələləri müzakirə etdilər.

Bütün görüşlər sparqs-ın böyük dəstəyi ilə baş tutdu.