2018-ci il fevralın 7-də Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı Tbilisi İvane Cavaxişvili Dövlət Universitetinin 100 illik yubileyinə həsr edilmiş silsilə tədbirlərdə iştirak etmək üçün dəvət olunduğu Tbilisi şəhərinə getmişdir.
Fevralın 7-dən 9-dək keçiriləcək tədbirlərdə Gürcüstanın hökumət nümayəndələri, xaricdən dəvət olunmuş tanınmış ictimai xadim və alimlərin iştirak etməsi planlaşdırılır.
Səfər çərçivəsində professor H.İsaxanlı xaricdən gəlmiş nümayəndə heyətinin tərkibində Gürcüstan Prezidenti Giorgi Margvelaşvili ilə görüşdü. Söhbət zamanı Gürcüstan Prezidenti Xəzər Universiteti haqqında çox eşitdiyini bildirdi, universitetin ünvanına xoş sözlər söylədi.
Həmçinin, Professor İsaxanlı Gürscüstanın Təhsil naziri Dr. Mixeil Çxenkeli ilə söhbət etdi, Gürcüstanda və Azərbaycanda təhsilin vəziyyəti, qarşılıqlı əməkdaşlıq ideyaları, Gürcüstanda yaşayan Azərbaycan-dilli əhalinin təhsil problemləri, bu işdə Xəzər Universitetinin marağı və köməyi məsələləri müzakirə edildi.
Bundan əlavə, Hamlet İsaxanlı Gürcüstan Elmlər Akademiyasının prezidenti, Gürcüstan universitetlərinin rektor və digər yüksək vəzifəli şəxsləri, tədbirdə iştirak edən xarici universitet rəhbərləri ilə görüşlər keçirməyə başlamışdır.