Yanvarın 16-da Xəzər Universitetinin Mərmər salonunda Humanitar və sosial elmlər fakültəsinin dizayn ixtisası, Musiqi və incəsənət departamentinin xalçaçılıq, rəssamlıq, xor və vokal fənləri üzrə təhsil alan birinci kurs tələbələrinin birinci semestrin yekunlarına həsr olunmuş hesabatı keçirildi.

Tədbirdə universitetin rəhbərliyi və əməkdaşları, tələbələr və qonaqlar iştirak edirdilər.

Mərmər salonda dizayn ixtisası, xalçaçılıq və rəssamlıq fənləri üzrə təhsil alan tələbələrin əl işlərindən ibarət geniş sərgi nümayiş etdirilirdi. Dizayn müəllimi, xalçaçı rəssam Afaq Kərimova tələbələri iştirakçılara təqdim edir, tələbələr öz işləri haqqında məlumat verir, rəyləri dinləyir və fikir mübadiləsi aparırdılar.

Sonra universitetin Musiqi və incəsənət departamentinin müdiri, əməkdar müəllim, pianoçu, dosent Zülfiyyə Sadıqovanın bədii rəhbərliyi ilə xor və vokal fənləri üzrə təhsil alan tələbələrin çıxışları başlandı. Universitetin müəllimi, Müslüm Maqomayev adına Dövlət Akademik Filarmoniyasının solisti Məhsəti Cabbarovanın bədii rəhbəri və dirijoru olduğu xor kollektivi və solistlər – Təhsil fakültəsinin tələbələri Nərmin İbrahimova, Şəmsiyyə Cəfərova, Afeliya Qocayeva, Təranə Məmmədli və İqtisadiyyat və menecment fakültəsinin tələbəsi Nicat İsmayılov Azərbaycan xalq və bəstəkar mahnılarını, həmçinin, xarici ölkə bəstəkarlarının mahnılarını türk, rus və ingilis dillərində ifa etdilər.

Bəstəkar Vüqar Camalzadə, universitetin İngilis dili və ədəbiyyatı departamentinin baş müəllimi Firəngiz Nəsirova, universitetin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, bəzi tövsiyələrini bildirməklə ümumilikdə tələbələrin yaradıcılığını müsbət qiymətləndirdilər.