2017-ci il dekabrın 27-də Xəzər Universitetində cari ilin sonuncu tədqiqat seminarı keçirildi. Seminar Xəzər Universitetinin Ph.D. və Magistr Tələbə Birliyi tərəfindən təşkil edilmişdi. Seminarın açılışını universitetin Elmi işlər üzrə prorektoru dosent İradə Xəlilova etdi. O, iştirakçıları qarşıdan gələn yeni –2018-ci il münasibətilə təbrik etdi və onlara uğurlar arzuladı. Qeyd edildi ki, son il universitetin müxtəlif tədqiqat sahələri üçün uğurlu olmuş, yüksək keyfiyyətli məqalələrin sayı əhəmiyyətli dərəcədə artmışdır. İl ərzində bir sıra yerli və xarici alimlərin iştirakı ilə çox maraqlı tədqiqat seminarları, jurnal klublar və elmi konfranslar keçirilmişdir. Həmçinin, bu il Xəzər Universitetinin Ph.D. və Magistr Tələbə Birliyi yaradılmışdır. Birlik artıq Ph.D. tələbə şəbəkəsi yaratmış, effektiv yazı bacarıqlarına həsr edilmiş bir sıra praktik təlimlər təşkil etmiş, müxtəlif sahədə fikir mübadiləsinə aid görüşlər keçirmişdir.

Daha sonra, Böyük Britaniyanın London Middlesex Universitetində “Universitet idarəçiliyində tələbələrin iştirakı” mövzusunda tədqiqat işi aparan, Xəzər Universitetinin İnkişaf Mərkəzinin direktoru Ph.D. namizəd Raziya İsayeva tədqiqat işi haqda seminar verdi. O, tədqiqatın məqsədi, apardığı keyfiyyət və kəmiyyət analizi metodlarını, alınmış ilkin nəticələri müqayisəli təqdim etdi və özünün Middlesex Universitetində qazandığı bilik və təcrübələrini iştirakçılarla bölüşdü. Seminarda bu sahədə olan müxtəlif alimlərin fikirləri və nəzəriyyələri üzərində müqayisəli müzakirələr aparıldı. Qeyd olundu ki, bu tədqiqatdan alınmış nəticələrin Azərbaycan universitetlərində praktiki olaraq həyata keçirilməsi onların təkcə tələbə həyatında deyil, həm də universitetlərin tanınması və effektivliyinin artırılmasın da kömək ola bilər.

Seminar yeni il tədbiri ilə davam etdi.