2017-ci il dekabrın 23-də Xəzər Universitetinin əcnəbi tələbələri, universitetin Tarix və arxeologiya departamentinin müəllimi Bayram Quliyev ilə birlikdə, Bakı şəhəri Suraxanı rayonunda yerləşən və Azərbaycanın XVII–XVIII əsrlərə aid tarixi abidəsi olan Atəşgah məbədini ziyarət etdilər. Qədim atəşpərəstlərin inanc yeri olan Atəşgah məbədi müxtəlif ölkələrdən (İran, İraq, Yəmən, İndoneziya və Nigeriya) gələn xarici tələbələr üçün həm maraqlı və yeni, həm də fərqli bir təəssürat yaratdı. Azərbaycanda multikulturalizmin izlərinin qədim zamanlara dayandığını öz gözləri ilə görən tələbələr üçün daim yanan odu müşahidə etmək bunun rəmzi sübutu idi. Demək olar ki, məbədin bütün otaqlarındakı eksponatlarla tanış olan tələbələr məbəddən gözəl təəssüratlarla ayrıldılar.

Ümumiyyətlə, tarix dərslərinin muzeylərdə tədris olunması nəinki xarici tələbələr, eləcə də, yerli tələbələr üçün də faydalı və ən yaxşı metodlardan biridir. Çünki tələbələrin tarixi hadisələrin bir parçası olan abidələri canlı olaraq öz gözləri ilə görmələri və onlara toxunmaları bu fənnin daha da keyfiyyətli öyrənilməsində əhəmiyyətli rol oynayır.