Dekabrın 21-də Xəzər Universitetinin Mərmər zalında universitetin Təhsil fakültəsinin Azərbaycan dili və ədəbiyyatı departamentində tədris olunan Türkologiyaya giriş, Türk ləhcələrinin müqayisəli qrammatikası fənlərinin müəllim və tələbələri tərəfindən hazırlanmış və Xəzər Universitetinin qurucusu, Direktorlar və Qəyyumlar Şurasının sədri professor Hamlet İsaxanlının yubileyinə həsr olunmuş “Türk Dünyası Bilgi Şöleni” adlı ədəbi-musiqili tədbir keçirildi.

Tədbirdə professor Hamlet İsaxanlı başda olmaqla universitetin rəhbərliyi, əməkdaşları və tələbələri, Türkiyə Cümhuriyyətinin Azərbaycan Respublikasındakı səfirliyinin mədəniyyət və turizm üzrə müşaviri Adem Keleş, AMEA Folklor İnstutunun xarici ölkələrlə əlaqələr bölməsinin rəhbəri, professor Əli Şamil, AMEA Nizami Gəncəvi adına Ədəbiyyat İnstitutunun şöbə müdiri, professor Bədirxan Əhmədli, AMEA Dilçilik İnstitutunun Təhsil şöbəsinin müdiri Qətibə Quliyeva, 365 xəbər.com-un təsisçisi Anar Əsəd və media mənsubları iştirak edirdilər.

Tədbirin məqsədi 200 milyondan çox insanın daxil olduğu böyük Turan ailəsinə diqqəti cəlb etmək, türk dünyasının dil yadigarları və folklor nümunələrini iştirakçıların nəzərinə çatdırmaq idi.

Tədbir tələbələrdən ibarət xorun ifasında türk xalqlarının birliyini tərənnüm edən “Turan marşı”nın ifası ilə başlandı.

Azərbaycan dili və ədəbiyatı departamentinin müəllimi Dr. İlahə Qurbanlı və Təhsil fakültəsinin dekanı Dr. Elza Səmədli çıxış edərək, tədbirin ideyasını və əhəmiyyətini açıqladılar.

Tədbirin kompozisiyası türk xalqlarının formalaşması, eramızdan əvvəlki dövrdən başlayaraq yazılı abidələrin tələbələr tərəfindən müvafiq ləhcədə səsləndirilməsi, folklor nümunələrinin ifası, sənədli filmlərdən fraqmentlərin nümayişi və türk xalqlarının adət - ənənələrinin, geyimlərinin, həmçinin mətbəxlərinin təqdimatından ibarət idi.

Böyük Hun imperatoru Metenin eramızdan əvvəl 176-ci ildə Çin imperatoruna göndərdiyi məktubdan başlayaraq sonrakı müxtəlif tarixi dövrlərə aid mətnlər də yazıldıqları ləhcədə səsləndirildi. Türk xalqlarının adət - ənənələri tələbələrin hazırladıqları səhnəciklər vasitəsilə nümayiş etdirildi, mahnılar ifa olundu.

AMEA Folklor İnstutunun xarici ölkələrlə əlaqələr bölməsinin rəhbəri, professor Əli Şamil, AMEA Dilçilik İnstitutunun Təhsil şöbəsinin müdiri Qətibə Quliyeva türk xalqlarının tarix və mədəniyətinin müxtəlif cəhətlərindən bəhs edərək tələbələrin çıxışlarını yüksək qiymətləndirdilər.

Xəzər Universitetinin qurucusu, Direktorlar və Qəyyumlar Şurasının sədri professor Hamlet İsaxanlı geniş çıxışında türk xalqlarının tarixi inkişafına, folkloruna və türk dillərinin formalaşmasına dair fikir və mülahizələrini söylədi, tədbirin təşkilatçılarına və tələbələrə təşəkkürünü bildirdi.

Tədbir Xəzər Universitetinin tələbələrdən ibarət xorunun və rəqs ansamblının ifası ilə başa çatdı.