2017-ci il dekabrın 20-də Xəzər Universiteti Mühəndislik və tətbiqi elmlər fakültəsinin tələbələri üçün “Azərkosmos” ASC-nin və Təhsil Nazirliyinin təşkilatçılığı ilə keçiriləcək “CanSat Azərbaycan-2018” tələbə peyki müsabiqəsinin təqdimatı keçirildi. “Azərkosmos” ASC-nin Korporativ kommunikasiya departamentinin aparıcı mütəxəssisi Fidan Behbudova müsabiqə haqqında məlumat verərək qeyd etdi ki, kosmik texnologiyalar sahəsində universitet tələbələrinin motivasiya və inkişafına yönəlmiş Beynəlxalq CanSat müsabiqəsi NASA, Amerika Astronomiya Cəmiyyəti (AAS), Amerika Aviasiya və Kosmik Elmlər İnstitutu (AIAA), eləcə də, kosmik sektorda aparıcı qurumların dəstəyi ilə 1998-ci ildən etibarən hər il keçirilir. 2018-ci ildən etibarən bu müsabiqənin Azərbaycanda da keçirilməsi planlaşdırılır. “CanSat Azerbaijan” adlandırılacaq bu müsabiqə ali təhsil müəssisələrinin tələbələri üçün nəzərdə tutulur. Müsabiqənin məqsədi tələbə peyki layihələrinə marağın daha da artırılması və azərbaycanlı tələbələr arasında kütləviləşdirilməsi, Azərbaycanın beynəlxalq analoji müsabiqələrdə daha çox və təcrübəli komandalarla təmsil olunması və uğurlu nəticələrin əldə edilməsi, gələcəkdə nano və digər real peyklərin ölkəmizdə məhz yerli mütəxəssislər tərəfindən hazırlanması üçün təcrübi bacarıq və vərdişlərin əldə edilməsidir.

Təqdimatın sonunda “Azərkosmos” ASC-nin nüməyəndələri tələbələrin müsabiqə ilə bağlı suallarını cavablandırdı.

Müsabiqə haqqında daha ətraflı məlumatı bu link vasitəsilə əldə etmək olar: 

http://cansat.az/.