2017-ci il dekabrın 14-də Xəzər Universitetinə dəvət edilmiş məruzəçi Dr. Mehrdad Jalalian Hosseini “Elmi yazı və tədqiqatların dərc edilməsi və etikası haqqında ümumi məlumat” mövzusunda məruzə ilə çıxış etdi. Seminarda Xəzər Universitetinin rektoru Dr. Hassan Niknafs, Elmi işlər üzrə prorektor dosent İradə Xəlilova, Azərbaycan Tibb Universitetinin Terapevtik və pediatrik propedevtika kafedrasının dosenti Səidə Xanməmmədova, Azərbaycan Tibb Universitetinin Biokimya kafedrasının assistenti Dr. Hafiz Osmanov, “Nərgiz” klinikasının rəhbəri Dr. Məlahət Qəhrəmanova, müxtəlif kafedralardan PhD və magistr tələbələr iştirak edirdilər.
İki hissədən ibarət seminar-konfransın birinci hissəsində Dr. Mehrdad Jalalian Hosseini effektiv abstrakt yazmaq, ikinci hissəsində isə jurnal məqalələrinin yazılmasında əsas prinsipləri necə tətbiq etmək barədə ətraflı məlumat verdi. Seminar zamanı effektiv yazı metodlarının müxtəlif yollarının istifadə edilməsində iştirakçılarla aktiv və geniş müzakirələr aparıldı.
Qeyd edək ki, Dr. Mehrdad Jalalian Hosseini “Elektron Həkim Jurnalı”nın (PubMed İndeksləşmiş) baş redaktoru və Mehr Nəşriyyatının təsisçisidir. O, bir sıra ölkələrdə çoxsaylı seminarlar və vorkşop təlimləri keçirmiş, həmçinin, tibbi konfranslarda dəvətli məruzəçi kimi çıxış etmişdir. Onun təcrübə sahələri etika, elmi yazı və elmi tədqiqatlardan nəşrlərin maksimum artırılmasıdır.