Dekabrın 1-də Xəzər Universiteti Karyera mərkəzinin meneceri vəzifəsini icra edən Səbinə Allahverənova Avropa Təhsil Fondunun (ATF) təşkilatçılığı ilə “Azərbaycanda məktəbdən işə keçidin təsviri” mövzusunda keçirilən seminarda iştirak etdi. Tədbirə 20-dən çox təşkilatın nümayəndəsi qatılmışdı.

Seminarda Avropa Birliyinin Azərbaycandakı nümayəndəliyinin Əməliyyatlar üzrə rəhbəri Jeroen Willems, Məşğulluq siyasəti və demoqrafiya şöbəsinin müdiri Elnur Süleymanov çıxış etdilər.

ATF-nin milli eksperti İlkin Nəzərov əmək bazarında gənclərin vəziyyəti mövzusuna toxunaraq, işə keçidi dəstəkləyən mövcud tədbirlər barədə məlumat verdi, diqqəti lazımi məlumatlara və statistikaya yönəltdi. Seminar ATF-nin Əmək bazarı və ixtisaslar üzrə baş mütəxəssis Eduarda Castel Branconun çıxışı ilə davam etdi. O, əmək bazarının gələcək inkişafı üçün vacib prioritetləri nəzərə çatdırdı və tövsiyələrini bildirdi.

Seminarın sonunda müzakirələr keçirildi və ATF hesabatının nəticələri barədə fikirlər səsləndirildi.

Qeyd edək ki, seminarın məqsədi gənclərin işə keçidini artırmağın mümkün yollarını müzakirə etmək idi. ATF inkişaf etməkdə olan ölkələrdə təhsil, təlim və əmək bazarı sistemlərinin islahatı və Aİ-nin xarici əlaqələr siyasəti kontekstində insan kapitalının potensialını tətbiq edən Avropa Birliyi təşkilatıdır. İtaliyanın Turin şəhərində yerləşən ATF 1994-cü ildən fəaliyyət göstərir.