2017-ci il dekabrın 4-də Xəzər Universitetinin Kitabxana-İnformasiya Mərkəzinin təşkilatçılığı ilə “Xəzər Universitetində I Çin həftəsi” adlı 4 günlük tədbirin açılış mərasimi oldu. Tədbirdə Bakı Dövlət Universitetinin Konfutsi İnstitutunun dekan və müəllimləri, Xəzər Universitetinin müəllim və tələbə heyəti iştirak edirdilər. Kitabxana-İnformasiya Mərkəzinin direktor müavini Aytac Misgərli tədbiri giriş sözü ilə açaraq iştirakçıları salamladı. Tədbirdə Xəzər Universitetinin Elmi işlər üzrə prorektoru İradə Xəlilova, Konfutsi İnstitutunun dekanı Luo Xiaozhi, Xəzər Universitetində Çin dilini tədris edən Li Ya və Kitabxana-İnformasiya Mərkəzinin əməkdaşı Samirə Orucova çıxış etdilər. Daha sonra Çin dilinin tədrisi ilə bağlı Xəzər Universitetinin İqtisadiyyat və menecment fakültəsinin tələbələri Çin, Azərbaycan və ingilis dillərində çıxışlarını təqdim etdilər. Tədbirin II yarısında Çin folklor sənətinin nümunələrindən ibarət təcrübi işlər göstərildi. Tədbir iştirakçılar tərəfindən böyük maraqla qarşılandı.