2017-ci il noyabrın 30-da Xəzər Psixoloji Xidmət Mərkəzi, Əlilliyi olan Tələbələr üçün Mərkəz və “Beynəlxalq Əlillər Cəmiyyəti” İctimai Birliyinin birgə əməyi ilə Xəzər Universitetində 3 Dekabr – Beynəlxalq Əlillər Günü münasibətilə tədbir həyata keçirildi.

Tədbirdə dövlət təşkilatları, xarici ölkə səfirliklərinin nümayəndələri, QHT və ictimaiyyət nümayəndələri iştirak edirdilər. Tədbirin bədii hissəsində 1 saylı Psixiatriya Xəstəxanasının pasiyentlərinin ifasında pantomim səhnəcik təqdim edildi. Əlillər Cəmiyyətinin Mədəni əlaqələr şöbəsinin kiçik rəqqasları da böyük həvəslə tədbirdə iştirak etdilər. Azərbaycanın görkəmli tarzəni Ramiz Quliyev tədbirin təşkilatçılarına təşəkkür edərək, Azərbaycanda əlilliklə əlaqəli maarifləndirici tədbirlərin əhəmiyyətindən danışdı. Müxtəlif musiqi nömrələri iştirakçılar tərəfindən böyük rəğbətlə qarşılandı. Əlilliyi olan istedadlı insanların əl işlərindən ibarət satış-sərgi də böyük maraq doğurdu. Tədbirdə Xəzər Psixoloji Xidmət Mərkəzinin direktoru Mələk Kərimova da Xəzər Universitetinin “Əlilliyi olan şəxslərin Azərbaycanın ali təhsil məktəblərinə inteqrasiyasının əsasının qoyulması” layihəsindən bəhs etdi və universitet nəzdində əlilliyi olan tələbələrin üçün qurulan mərkəzin əhəmiyyətini də tədbir iştirakçılarına məruzə etdi. Tədbir böyük coşğu ilə qarşılanan “Qarabağ” şikəstəsi ilə yekunlaşdırıldı.