2017-ci il noyabrın 19-dan 24-dək Xəzər Universiteti Təhsil fakültəsinin dekanı Dr. Elza Səmədova, Riyaziyyat kafedrasının müdiri Dr. Əli Hüseynli və İnkişaf mərkəzinin layihə meneceri Ülkər Bayramova “Azərbaycan universitetlərində tədris və təlimin təkmilləşdirilməsi” adlı ERASMUS+ layihəsi çərçivəsində Türkiyənin Qazi Universitetində keçirilən silsilə seminarlarda iştirak etdilər.
Tədbirdə həm Azərbaycandan (Xəzər Universiteti, Naxçıvan Dövlət Universiteti, Gəncə Dövlət Universiteti, Sumqayıt Dövlət Universiteti, Bakı Slavyan Universiteti, Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Universiteti), həm də Avropadan (Debrecen Universiteti (Macarıstan), Valensiya Politexnik Universiteti (İspaniya), Vyana Tətbiqi Elmlər Universiteti (Avstriya), Qazi Universiteti (Türkiyə) olan tərəfdaş universitetlərin 40-a yaxın nümayəndəsi iştirak edirdi.
5 günlük seminarda iştirakçılar Qazi Universiteti, universitet fakültələri, universitetdə təlim-tədrisin təşkili, fənn laboratoriyaları və laboratoriyalarda təcrübələrin aparılması, müxtəlif dərslərdə öyrənmə və öyrətmənin yeni metodlarla təşkili haqqında geniş məlumatlar əldə etdilər, müxtəlif dərsləri əyani olaraq dinlədilər. Bundan əlavə, iştirakçılar üçün açıq havada coğrafiya dərslərinin təşkili və onun həyata keçirilməsini nümayiş etdirmək üçün Ankaranın Kizilcahamam bölgəsinə səfər təşkil edildi və açıq havada dəsrlərin keçirilməsi metodları əyani olaraq göstərildi.
Qazi Universitetində keçirilmiş seminarlar bütün tədbir iştirakçıları tərəfindən maraqla qarşılandı və yeni təcrübələrin əldə olunmasına nail olundu.
Bununla yanaşı, Dr. Elza Səmədova Qazi Universiteti, Çankaya Universiteti, Hacettepe Universiteti, Orda Doğu Texniki Universiteti və Ankara Universitetinin prorektorları, Təhsil İnstitutları və Təhsil fakültələrinin nümayəndələri ilə də məhsuldar görüşlər keçirdi və bu qurumlarla Xəzər Universitetinin Təhsil fakültəsi arasında əməkdaşlıq qurulması, magistratura və doktorantura səviyyəsində ikili ixtisas və ortaq ixtisasartırma proqramılarının həyata keçirilməsi istiqamətində müzakirələr apardı.
Bundan başqa, Dr. Elza Səmədova Ankara səfərində Çankaya Universitinə bağlı “Özəl Arı Okulları” orta məktəbini ziyarət etdi və bu məktəbdə ERASMUS+ layihəsi çərçivəsində qurulan laboratoriyalarla tanış oldu və Xəzər Universitetinin “Dünya” məktəbi ilə dostluq əlaqələrinin qurulması, birgə layihələr verilməsi istiqamətində ilkin müzakirələr apardı.
Görüşlər əsnasında bu universitetlərin nümayəndələrinə 2018-ci il aprelin 20-si və 21-də Xəzər Universitetində təşkil olunacaq “Qlobal təhsil” adlı I Beynəlxalq Təhsil Simpoziumu haqqında da məlumat verildi, posterlər təqdim olundu.