AMEA M.Füzuli adına Əlyazmalar İnstitutunun nəşri olan “Filologiya məsələləri” jurnalının 2017-cı ilin noyabrında çıxan 15-ci sayında Xəzər Universiteti Azərbaycan dili və ədəbiyyatı departamentinin müəllimi Qardaşxan Əzizxanlının “Çağdaş vətəndaşlıq lirikasında həqiqi vətənpərvərlik və surroqat patriotizm” adlı məqaləsi çap olunmuşdur. Məqalədə çağdaş Azərbaycan poeziyasında şairlərimizin yaradıcılığı əsasında həqiqi vətənpərvərlik duyğuları ilə yazılmış poetik nümunələr, həmçinin mədhiyyə xarakterli bəzi mətnlər nəzərdən keçirilir. Məqalədə göstərilir ki, M.Araz, S.Tahir və M.İsmayıl kimi şairlərin vətəndaşlıq lirikası əsl vətənpərvərliyin poetik ifadəsi baxımından səciyyəvidir. Onların yaradıcılığında vətən mövzusu özünün yeni poetik xarakteri ilə diqqəti cəlb edir.

Məqalədə, eyni zamanda, şeir adı ilə ədəbi orqanlarda çap edilən sönük mətnlərdən də danışılır. Qafiyəpərdazlıqdan ibarət söz yığınlarına qarşı milli dirçəlişimizdə, azərbaycançılıq məfkurəsinin formalaşmasında mühüm rol oynamış, əsl vətənpərvərlik şeirləri qoyulur.

Məqalədə göstərilir ki, çağdaş vətəndaşlıq lirikasında həqiqi vətənpərvərlik və surroqat patriotizm bir-birindən kəskin fərqlənir. Şeirdə həqiqi vətənpərvərlik motivləri səmimiliyi ilə oxucu qəlbinə yol tapır. Obrazlılıqdan məhrum saxta patriotizmlə dolu mətnlər isə oxucu zövqünü oxşamır.

Elmi məqalənin rəyçisi filologiya elmləri doktoru professor Bədirxan Əhmədovdur.