2017-ci il noyabrın 13-də “The Chain” (Zəncir) komandası Xəzər Universiteti Beynəlxalq Əlaqələr Şöbəsi tərəfindən təşkil olunan Beynəlxalq Təhsil Həftəsi çərçivəsində universitetdə bir günlük məlumat sessiyası keçirdi. Bu sessiya zamanı komanda üzvləri üzərində işlədikləri sosial media kampaniyası haqqında universitetin işçi heyətini və tələbələri məlumatlandırdılar. Əsas məqsəd kampaniyanın əhatə dairəsini genişləndirmək, daha çox insanı məlumatlandırmaq və insanları dəstək olmağa çağırmaq idi.

Bu tədbir zamanı təxminən 100-ə yaxın insan kampaniyaya maraq göstərdi və layihənin brend fincanını qazanmaq şansını əldə etmək üçün qeydiyyatdan keçdilər. Eyni zamanda, iştirakçıların tədbir zamanı #iampartofthechain həştəqi ilə şəkil çəkdirib öz sosial media hesablarında paylaşması da əsas komponentlərdən biri idi. Layihə komandası bu həştəqdən istifadə edərək, daha çox insana çatmaq və kampaniyanın əhatəsini qloballaşdırmaq istəyir.

“The Chain” Xəzər Universitetinin tələbələri tərəfindən onlayn nifrət nitqi ilə mübarizə aparmaq üçün yaradılmış sosial media kampaniyasıdır. Kampaniya universitetin Facebook tərəfindən maliyyələşdirilən və EdVenture Partners şirkəti tərəfindən idarə olunan “P2P: Facebook Qlobal Rəqəmsal Çağırış” layihəsindəki iştirakı çərçivəsində həyata keçirilir.