2017-ci il noyabrın 3-də Xəzər Universitetində Dünya Tək Sağlamlıq Gününə həsr edilmiş tədbir keçirildi. Tədbirdə Azərbaycan Respublikası Səhiyyə Nazirliyinin baş epidemioloqu və Azərbaycan Tibb Universitetinin epidemiologiya kafedrasının müdiri professor İbadulla Ağayev, Azərbaycan Tibb Universitetinin elmi işçisi Dr. Hafiz Hacıyev, Milli Onkologiya Mərkəzinin beynəlxalq əlaqələr və innovasiyalar departamentinin müdiri Dr. Elturan İsmayılov, Xəzər Universitetinin rektoru Dr. Hassan Niknafs, Elmi işlər üzrə prorektor dosent İradə Xəlilova, Xəzər Psixoloji Xidmət Mərkəzinin direktoru doktorant Mələk Kərimova, doktorant Validə Kərimova, bioloji elmlər departamentinin elmi işçisi Dr. Babək Əlibəyov, departamentin PhD tələbələri, Təhsil fakültəsinin biologiya, kimya və biologiya, coğrafiya müəllimliyi ixtisası tələbələri iştirak edirdilər.
Bioloji elmlər departamentinin doktorantı Havva Adlı “Dünya Tək Sağlamlıq Komissiyasının missiyası, tarixi, məqsədi və qlobal strateji planları” mövzusunda çıxış etdi. Sonra Dr. Babək Əlibəyov “Antimikrobial rezidentlik və dünya üzrə onun yaratdığı problemlər” mövzusunda məlumat verdi. Coğrafiya və ətraf mühit departamentinin 3-cü kurs tələbəsi Xanım Adışirinli “Ətraf mühit, problemlər və həllər” mövzusunda çıxış etdi.
Baytar həkimi və doktorant Mehdi Zakeri “Vektorlu patogenlər və infeksiyaların keçiricilərlərlə yayılması və onların qarşısının alınması yolları” mövzusunda çıxış etdi və bu problemin həllinin Avropanın Qida Təhlükəsizliyi Təşkilatı (European Food Safety Authority –EFSA), Avropanın Xəstəliyə Qarşı Mübarizə və İdarəetmə Mərkəzi (European Centre for Disease Prevention and Control – ECDPC) və Dünya Sağlamlıq Təşkilatı (World Health Organization – WHO) tərəfindən dəstəkləndiyini vurğuladı.
Tədbir maraqlı müzakirələrlə keçdi. Sonda professor İbadulla Ağayev keçirilən tədbirin mühüm əhəmiyyətini qeyd etdi. O, tələbələrə və gənc tədqiqatçılara innovativ yanaşmaları inkişaf etdirməklə, patogenləri vaxtında aşkar etməyi və qarşısını almağı tövsiyə etdi. Gələcəkdə bu sahənin daha da işıqlandırılması, tədqiqat işlərinin aparılması, seminar və konfransların təşkil edilməsi planlaşdırıldı.