2017-ci il oktyabrın 24-də BMT-nin Azərbaycandakı nümayəndəliyi Hilton otelində qurumun yaradılmasının 72-ci ildönümü - BMT Günü və BMT-Azərbaycan münasibətlərinin 25 illiyinə həsr olunmuş tədbir keçirib.
Tədbir Azərbaycan dövlət himninin səsləndirilməsi ilə başlayıb. Himni Xəzər Universiteti Kamera orkestrinin müşayiəti ilə Xəzər Universitetinin müəllimi, Müslüm Maqomayev adına Dövlət Akademik Filarmoniyasının solisti Məhsəti Cabbarova ifa edib. Tədbirin rəsmi hissəsində BMT-nin Azərbaycandakı rezident əlaqələndiricisi və BMT-nin İnkişaf Proqramının (BMTİP) rezident nümayəndəsi Qulam İsakzai və Xarici işlər nazirinin müavini Mahmud Məmmədquliyev çıxış etmişlər. BMT Baş katibi Antonio Guterresin videomüraciəti səsləndirilib.
Xəzər Universiteti Məzunlarla iş mərkəzinin direktoru Baba Bayramlı tədbirdə iştirak etmişdir.
Tədbirin bədii hissəsində Xəzər Universiteti Musiqi və incəsənət departamentinin müdiri, əməkdar müəllim, pianoçu, dosent Zülfiyyə Sadıqovanın rəhbərliyi ilə universitetin Kamera orkestri və Məhsəti Cabbarova Azərbaycan bəstəkarlarının əsərlərindən ibarət konsert proqramı ilə çıxış etmişlər.