2017-ci il oktyabrın 23-də Xəzər Universitetinin Tarix və arxeologiya departamentinin təşəbbüsü ilə Təhsil fakültəsi tarix müəllimliyi ixtisasının “Arxeologiyaya giriş” dərsində AMEA Arxeologiya və Etnoqrafiya İnstitutunun əməkdaşı, elmi işçi, topoqraf-rəssam Vəfa Həsənova iştirak etdi. Dərs zamanı gələcək tədqiqatçılar üçün zəruri olan əməli bilik və bacarıqlar tədris olundu. Tələbələrə abidələrin topoqrafiyası, qazıntının stratiqrafiyası və tapıntıların təsvirinin yaradılması texnikası barədə məlumatlar verildi. Mütəxəssisin izahı və təqdimatı ilə tələbələr özləri əyani vəsaitlərdən istifadə etməklə, gil qabların təsvirlərini çəkdilər.

Dərs tətbiqi arxeologiya sahəsi üzrə tələbələrin məlumatlandırılması və vərdişlərə yiyələnmələri məqsədi daşıyırdı. Fənnin metodoloji və əyani səviyyə daşıması baxımından dərs tələbələrin marağına səbəb oldu.