2017-ci il oktyabrın 17-də Xəzər Universitetinin “Neftçilər” kampusunda “Kainat” Təhsil Mərkəzinin təşkil etdiyi hazırlıq kurslarında iştirak edən tələbələrlə görüş keçirildi.

Beynəlxalq əlaqələr şöbəsinin direktoru Turan Cəfərova bütün iştirakçıları salamlayaraq, “Kainat” Təhsil Mərkəzinə tələbə qəbulu sahəsində əməkdaşlığa görə minnətdarlığını bildirdi. “Kainat” TM-in hazırlıq kurslarına davam etmiş 40 şagird 2017-2018-ci tədris ilində Xəzər Universitetində təhsil almağı seçmişdir. Qeyd edək ki, 40 tələbənin 25 nəfəri ali təhsilə və sosial inteqrasiyaya çıxış üçün Azərbaycan gənclərinin davamlı inkişafını təmin edən bir sıra yerli və beynəlxalq şirkətlərin korporativ sosial məsuliyyət siyasəti ilə həyata keçirilən “Gələcəyini Qur!” gəncliyə dəstək layihəsinin məzunudur. Xəzər Universiteti və “Kainat” Təhsil Mərkəzi “Gələcəyini Qur!” layihəsinin akademik tərəfdaşıdır.

İlk olaraq, Xəzər Universitetinin rektoru, Mühəndislik və tətbiqi elmlər fakültəsinin dekanı vəzifəsini yerinə yetirən Dr.Hassan Niknafs tələbələrə müraciət etdi. Dr. Niknafs tələbələri Xəzər Universitetinə qəbul olmaları münasibətilə təbrik etdi, onlara təhsildə uğurlar arzuladı. İqtisadiyyat və menecment fakültəsinin dekanı Ceyhun Məmmədov, Təhsil fakültəsinin dekan müavini Zərifə Əliyeva, Humanitar və sosial elmlər fakültəsinin dekanı dosent Cabir Xəlilov gəncləri Azərbaycanın aparıcı ali təhsil müəssisələrindən birinə qəbul olmaları münasibətilə təbrik etdilər, fakültələr və tələbələrin məşğul ola biləcəyi fəaliyyətlər haqda qısa məlumat verdilər. “Kainat” Təhsil Mərkəzinin təsisçisi və direktoru İlqar Ağakişiyev də tələbələrini təbrik etdi və Xəzər Universiteti ilə əməkdaşlıqdan məmnun olduğunu bildirdi.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı təhsilin vacibliyi barədə qısa bir çıxış etdi və öz tələbəlik həyatından qısa bir hekayəni paylaşdı.