2017-ci il oktyabrın 10-da Xəzər Universitetində Texniki Yardım Missiyası (Technical Assistance Mission – TAM) çərçivəsində ikili dərəcə proqramlarının yaradılması ilə bağlı təlim öz işinə başladı. Təlimi giriş sözü ilə Xəzər Universitetinin Tədris İşləri üzrə prorektoru professor Məhəmməd Nuriyev açdı və təlim iştirakçılarına uğurlar dilədi.
Tədbirdə Finlandiya Milli Təhsil Agentliyində proqram meneceri olan Annika Sundbäck-Lindroos, Azərbaycan Respublikası Təhsil Nazirliyinin Elm, ali və orta ixtisas təhsili şöbəsinin baş məsləhətçisi Yaşar Ömərov, müxtəlif Azərbaycan universitetlərinin nümayəndələri və həmçinin, Xəzər Universitetinin əməkdaşları iştirak edirdilər.
Təlimin keçiriləcəyi iki gün ərzində ikili dərəcə proqramı üzrə ekspert, Finlandiya Milli Təhsil Agentliyində proqram meneceri olan Annika Sundbäck-Lindroos ikili dərəcə proqramları və onun yaratdığı imkanlar, regiondan və Avropadan uğurlu nümunələr, inkişaf prosesinin praktiki detalları, bu cür proqramların yaradılması üçün tələb olunan minimum tələblər haqqında məlumat və bu proqramları yaratmaq üçün məsləhətlər verəcək.
Oktyabrın 11-də təlimə Azərbaycan Respublikası Təhsil Nazirliyi Akkreditasiya və Nostrifikasiya departamentinin eksperti Anar Nağıyev də qatılacaq.
Təlimin sonunda iştirakçılara sertifikatlar veriləcək.