2017-ci il oktyabrın 7-də Azərbaycan Respublikası Gənclər və İdman Nazirliyinin dəstəyi, “Gənclərin Təhsil, Təlim, Peşə və İnkişaf Mərkəzi” İctimai Birliyi və Azərbaycan Robototexnika Mühəndisliyi Akademiyasının (Azerbaijan Robotics Engineering Akademy - AREA) təşkilatçılığı ilə Bakı Olimpiya İdman Kompleksində ilk dəfə olaraq Dünya Robot Olimpiadasının (DRO) Azərbaycan üzrə seçim yarışı keçirildi.
Tədbirin açılış mərasimində çıxış edən gənclər və idman nazirinin müavini İntiqam Babayev yarışların gənclərə bilik və bacarıqlarını nümayiş etdirmək, həmkarları ilə təcrübə mübadiləsi aparmaq üçün gözəl imkan yaratdığını qeyd edib. Bildirib ki, belə olimpiadaların keçirilməsi gənclərin elmi inkişafına böyük töhfə verəcək.
Yarışların baş hakimi, yaponiyalı mütəxəssis, AREA-nın həmtəsisçisi Kohe İşiqami çıxışında ölkəmizdə bu sahənin inkişafı üçün uğurlu işlər aparıldığını qeyd edib. Baş hakim gənclərin bu sahədə təhsil almasının Azərbaycanın inkişafı və onların gələcəyi üçün önəmli olduğunu deyib. O, Azərbaycan gənclərinin bu sahəyə böyük həvəs göstərdiklərini və ölkəmizdə robototexnikanın inkişafı üçün hər cür şəraitin yaradıldığını vurğulayıb.
Dünya Robot Olimpiadası Azərbaycan Təşkilat Komitəsinin texniki rəhbəri Rəhman Rəsulzadə yarışların keçirilməsinə təşkilati dəstək verib.
Komandalar, “Robot futbolu”, “Açıq katerqoriya” və “Əsas kateqoriya” olmaqla üç istiqamətdə mübarizə aparıblar.
Yarışda Xəzər Universiteti, Bakı Ali Neft Məktəbi, Bakı Mühəndislik Universiteti, ADA Universiteti, Akademik Zərifə Əliyeva adına lisey, “Kaspi” liseyi, Bakı Modern Təhsil Kompleksi, “British School in Baku”, 215 saylı tam orta məktəb, İstək liseyi və 267 saylı məktəb-liseyi təmsil edən, üzvləri 9-19 yaşlı məktəbli və tələbələrdən ibarət olan komandalar iştirak edirdilər.
Xəzər Universiteti Mühəndislik və tətbiqi elmlər fakültəsinin ikinci kurs tələbələri ilə təmsil olunurdu.
3 komanda ilə “Əsas kateqoriya”da mubarizə aparan “Xəzər”in komandaları birinci (Vüsal İsmayılov, Məhəmməd Məmmədli, Əhməd Ərəbov), ikinci (Emin Bayramov, Ayxan Əlifov, Asəf Novruzlu) və üçüncü (İlqar Hüseynli, Taleh Məmmədov) yerlərə layiq görüldülər.
Qalib komandalar diplom və qiymətli hədiyyələrlə mükafatlandırıldı.