2017-ci ilin sentyabrında Xəzər Universiteti BMT-nin Səhralaşmaya Qarşı Mübarizə Konvensiyasında akkreditasiya olunmuşdur.
Bu konvensiyanın əsas məqsədi insan faəliyyətinin və İqlim Dəyişmələrinin təsiri ilə Yer kürəsində gedən səhralaşmanın və bitki örtüyünün məhv olmasının qarşısını almaqdır. Konvensiya bunu dövlətlərin öz üzərində götürdüyü məcburi öhdəliklər vasitəsilə edir. Qeyd edək ki, Azərbaycan da bu konvensiyaya qoşulmuşdur. Bu, o deməkdir ki, Azərbaycan bir dövlət olaraq beynəlxalq və milli təşəbbüslər vasitəsilə ölkə ərazisində səhralaşmaya qarşı mübarizə aparır.
Xəzər Universitetinin bu konvensiyada akkreditasiya olunması təsadüfi deyil. Xəzər Universitetində 2007-ci ildə təsis olunmuş Ətraf Mühitin Tədqiqi Mərkəzi öz elmi tədqiqatlarında səhralaşmanın kökünün kəsilməsi məsələsini də əsas istiqamətlərdən biri kimi qoymuşdur. Akkreditasiya zamanı çoxsaylı sənədlər tələb olunmuş, eyni zamanda, mərkəzin elmi fəaliyyəti dərindən təhlil edilmişdir. Bu ilin sentyabrında Çinin Ordos şəhərində keçirilən COP13 konfransında (Conference of Parties) Xəzər Universitetinin akkreditasiya olunması təsdiq edilmişdir. Maraqlı olan odur ki, Azərbaycandan yalnız İDEA (sədr Leyla Əliyeva) təşkilatı akkreditasiya oluna bilmişdir. Keçmiş Sovet respublikalarından yalnız Gürcüstandan 4, Azərbaycandan isə 2 təşkilat akkreditasiya olunmuşdur. Digər respublikalardan isə heç bir təşkilat akkreditasiya olunmamışdır.
Xəzər Universiteti müşahidəçi təşkilat olaraq, BMT konvensiyasının bütün tədbirlərinə qatılacaq. Eyni zamanda, elmi fəaliyyətində BMT strükturları ilə sıx əlaqəli şəkildə səhralaşmanı azaldan bütün mövzuları qoyacaq. Eyni zamanda, bu, Xəzər Universitetinin bu sahədəki beynəlxalq əlaqələrini daha da artırmağa imkan yaradacaq.