2017-ci il sentyabrın 28-də Xəzər Universitetinin rektoru Hassan Niknafsın sədrliyi ilə Elmi şuranın yeni dərs ilində ilk iclası keçirildi.

İclasda universitetin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, yeni dərs ilinin başlanması münasibətilə əməkdaşları təbrik etdi, tövsiyələrini bildirdi. Professor universitetdə elmi işlərin gücləndirilməsi zərurətini vurğulayaraq, bunu üçün təşkilati tədbirin də görüldüyünü – universitetdə elmi işlər üzrə prorektor vəzifəsinin təsis edildiyini və bu vəzifəyə Bioloji elmlər departamentinin müdiri İradə Xəlilovanın təyin olunduğunu bildirdi.

İclasın gündəliyinə əsasən rektor Hassan Niknafs və dekanlar universitetə yeni təyin olunmuş işçiləri Elmi şuranın üzvlərinə təqdim etdilər. Xəzər Universiteti Elmi şurasının yeni tərkibi haqqında prorektor Məhəmməd Nuriyev, məzunlar haqqında Humanitar və sosial elmlər fakültəsinin dekanı Cabir Xəlilov, Təhsil fakültəsinin dekanı Elza Səmədova, İqtisadiyyat və menecment fakültəsinin dekanı Ceyhun Məmmədov və Mühəndislik və tətbiqi elmlər fakültəsinin dekan müavini Vəfa Aslanova, doktorant və dissertantların dissertasiya mövzusu, elmi rəhbərlərinin təsdiqi və ixtisaslarının dəyişdirilməsi haqqında Magistratura, doktorantura və elmi işlər üzrə bölmənin müdiri Eldar Şahgəldiyev və elmi adların verilməsi haqqında prorektor İradə Xəlilova məlumat verdilər və müvafiq qərarlar qəbul edildi.

İclasda cari məsələlər də müzakirə olundu.