Xəzər Universiteti artıq neçə ildir ki, Heydər Əliyev Fondu və Mədəniyyət və Turizm Nazirliyinin təşkilatçılığı ilə keçirilən Üzeyir Hacıbəyli beynəlxalq musiqi festivallarında fəal iştirak edir. Xəbər verdiyimiz kimi, 2017-ci il sentyabrın 20-də universitetin Mərmər zalında Üzeyir Hacıbəyli IX Beynəlxalq Musiqi Festivalı (18-26 sentyabr) çərçivəsində “Üzeyir Hacıbəyli alim, musiqişünas, ictimai xadim” mövzusunda konsert - konfrans keçirilmişdi.
Sentyabrın 21-də isə universitetin “Dünya” konsert salonunda festival çərçivəsində Unesco-nun Sülh artisti, pianoçu Elisso Bolkradzenin iştirakı ilə konsert keçirildi. Konsertdə universitetin rəhbərliyi və əməkdaşları, tələbələr, festivalın iştirakçısı olan xarici qonaqlar iştirak edirdilər. Konsertdən əvvəl Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı iştirakçılara Üzeyir Hacıbəylinin həyat və yaradıçılığı haqqında geniş məlumat verdi.
Konsertdə universitetin Kamera orkestrinin ifasında Üzeyir Hacıbəyli, Fikrət Əmirov, Sərdar Fərəcov və Sevda Rəhimovanın; Haydn və Şostakoviçin əsərləri səsləndi. Bethovenin fortepiano və simfonik orkestr üçün 1 nömrəli konsertinin 3-cü hissəsi Xəzər Universitetinin simfonik orkestri və Elisso Bolkradze tərəfindən ifa olundu.
Konsertin bədii rəhbəri Xəzər UniversitetininMusiqi və incəsənət departamentinin müdiri, əməkdar müəllim, dosent Zülfiyyə Sadıqova, dirijoru beynəlxalq müsabiqələr laureatı, Bakı Musiqi Akademiyasının müəllimi Cavad Tağızadə idi.
Konsertdən sonra Elisso Bolkradze ustad dərsi keçdi.