Xəzər Universiteti artıq neçə ildir ki, Heydər Əliyev Fondu və Mədəniyyət və Turizm Nazirliyinin təşkilatçılığı ilə keçirilən Üzeyir Hacıbəyli beyməlxalq musiqi festivallarında fəal iştirak edir. 2017-ci il sentyabrın 20-də Universitetin Mərmər zalında Üzeyir Hacıbəyli IX Beynəlxalq Musiqi Festivalı (18-26 sentyabr) çərçivəsində “Üzeyir Hacıbəyli alim, musiqişünas, ictimai xadim” mövzusunda konsert - konfrans keçirildi.
Tədbir Azərbaycan Dövlət Himninin ifası ilə başlandı. Dahi bəstəkarın həyat və yaradıcılığına aid slayd-şoular və sənədli film nümayiş etdirildi.
Konsert-konfransı giriş sözü ilə universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqova açdı.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Xalq artisti, tarzən Ramiz Quliyev, Azərbaycan Bəstəkarlar İttifaqının katibi, Əməkdar incəsənət xadimi, Bakı Musiqi Akademiyasının professoru Zemfira Qafarova, Üzeyir Hacıbəyli ev muzeyinin direktoru, Azərbaycan Bəstəkarlar İttifaqının katibi, əməkdar incəsənət xadimi, professor Sərdar Fərəcov, Əməkdar incəsənət xadimi, Bakı Musiqi Akademiyasının professoru Zümrüd Dadaşzadə, Bakı Musiqi Akademiyasının magistr tələbələri Aysel Mirzəsoy, Məkkə Rəsulzadə və Fəriqə Məmmədzadə tədbirdə çıxış etdilər. Çıxışlarda Üzeyir Hacıbəylinin çoxşaxəli yaradıcılığının müxtəlif cahələrindən danışıldı.
Zülfiyyə Sadığovanın bədii rəhbərliyi ilə konfransın konsert proqramında Xəzər Universitetinin Kamera orkestrinin müşayiəti ilə Üzeyir Hacıbəyli, Müslüm Maqomayev və Aqşin Əlizadənin əsərləri ifa olundu. Dirijor Bakı Musiqi Akademiyasının müəllimi, beynəlxalq müsabiqələr laureatı Cavad Tağızadə, solistlər - Müslüm Maqomayef adına Azərbaycan Dövlət Akademik Filarmoniyasının solisti, Xəzər Universitetinin müəllimi Məhsəti Cabbarlı və M. F. Axundov adına Azərbaycan Dövlət Akademik Opera və Balet Teatrının solisti Taleh Yahyayev idi.
Konsert - seminarda ölkənin musiqi ictimaiyyətinin nümayənfdələri, Xəzər Universitetinin əməkdaşları və tələbələri iştirak edirdilər.