2017-ci il sentyabrın 19-da Xəzər Universitetinin Mərmər zalında universitetin layihəsi olan Potensial məktəb direktorlarına məktəbin idarə edilməsi üzrə  təlimin növbəti – may-iyul aylarında keçirilmiş  kursunu bitirən 23 məzuna sertifikatların təqdim olunması mərasimi keçirildi. Qeyd edək ki, bu təlim kursu cari tədris ilində də işini davam etdirəcəkdir. 

Təlimin əsas məqsədi ölkədəki yeni təhsil strategiyasına və təhsil islahatına uyğun olaraq rəhbər işdə fəaliyyət göstərmək istəyən təhsil işçilərinin bilik və bacarıqlarını artırmaq, onları dünyadakı səmərəli idarəetmə təcrübəsi ilə tanış etməkdir.

Təlimlər zamanı kursun məşğələlərində mühazirələr dinlənilmiş, iştirakçıların təqdimatları olmuş, müzakirələr aparılmış, söhbətlər keçirilmişdir.

Qeyd edək ki, indiyə qədər layihə çərçivəsində 468 nəfər təlimdən keçmiş, onlardan 50 nəfərdən çoxu (bu rəqəm müntəzəm artır) direktor və ya direktor müavini vəzifəsinə təyinat almışdır.

Mərasimdə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı geniş çıxış etdi. O, kursun əhəmiyyətindən danışaraq, məzunlara əldə etdikləri nəzəri və  təcrübi bilikləri öz işlərində uğurla tətbiq etmək üçün tövsiyələrini bildirdi.

Sonra məzunlara  sertifikatların təqdim olunması mərasimi başlandı. Sertifikatları professor Hamlet İsaxanlı, universitetin rektoru Dr. Hassan Niknafs təqdim etdilər. Xatirə şəkilləri çəkildi.

Sertifikatların təqdim olunması başa çatdıqdansonra çıxış edən Dr. Hassan Niknafs məzunları təbrik etdi, onlara mühüm işlərində uğurlar arzuladı.

Kursu bitirənlər adından  Zemfira Məsiyeva çıxış edərək, kursun yüksək səviyyədə təşkilinə görə Xəzər Universitetinin rəhbərliyinə, layihə rəhbəri – universitetin İnkişaf mərkəzinin direktoru Raziyə İsayevaya, layihə koordinatoru – Təhsil fakültəsinin dekanı Elza Səmədovaya və müəllimlərə təşəkkürünü bildirdi.

Mərasim iştirakçılarına Xəzər Universitetinin Musiqi və incəsənət departamentinin hazırladığı konsert proqramı təqdim olundu.