Sentyabrın 15-də Xəzər Universitetində yeni dərs ilinin başlanmasına həsr olunmuş mərasim keçirildi. Mərasimdə universitetin rəhbərliyi və əməkdaşları, universitetə yeni qəbul olunmuş tələbələr və onların valideynləri iştirak edirdilər.
Mərasim Azərbaycan Dövlət Himninin ifası ilə başladı. Xəzər Universitetinin təsisçisi, Direktorlar və qəyyumlar Şurasının sədri professor Hamlet İsaxanlı çıxıç edərək, universitetə qəbul olunmuş gəncləri təbrik etdi, universitetdə tələbələrin təhsili və mənəvi inkişafı üçün yaradılmış saf və şəffaf mühitdən, universitetin uğurlarından, o cümlədən dünya universitetlərinin beynəlxalq reytinqlərində yer almasından danışdı. Universitetin rektoru Dr. Hassan Niknafs da tələbələri təbrik etdi, onlara təhsillərində uğurlar arzuladı.
H. İsaxanlı, H. Niknafs, İqtisadiyyat və menecment fakültəsinin dekanı Ceyhun Məmmədov, Təhsil fakültəsinin dekanı Elza Səmədova və Humanitar və sosial elmlər fakültəsinin dekanı Cabir Xəlilov universitetə yüksək balla qəbul olunmuş tələbələrə tələbə bileti və hədiyyələr təqdim etdilər, onlarla xatirə şəkl çəkildi.
Universitetə yeni qəbul olunmuş tələbələr adından Əli Məhərrəmov (malıyyə ixtisası) çıxış edərək, Xəzər Universitetində tələbələr üçün yaradılmış əlverişli şərait sayəsində yüksək ixtisaslı mütəxəssislər kimi yetişmək üçün ciddi səy göstərəcəklərini bildirdi.
Universitetin Musiqi və incəsənət departamentinin hazırladığı konsertdə tələbə qızlar və oğlanlardan ibarət rəqs qrupları çıxış etdilər, Azərbaycan Dövlət Akademik Opera və Balet Teatrının solisti, universitetin müəllimi Məhsəti Cabbarlının ifasında mahnılar səsləndi.
Mərasim yeni qəbul olunmuş tələbələrin auditoriyalara dəvət olunması ilə başa çatdı. Auditoriyalarda onlar fakültə dekanları, departament müdirləri və əməkdaşlarla görüşdülər. Onlara təhsil alacaqları ixtisaslar haqqında ətraflı məlumat verildi və sualları cavablandırıldı.