2017-ci il sentyabrın 7-də Xəzər Universitetinin Direktorlar və Qəyyumlar Şurasının sədri professor Hamlet İsaxanlı ali təhsil müəssisəsinin İqtisadiyyat və menecment fakültəsinin yeni müəllim kollektivi ilə görüş keçirdi. İqtisadiyyat və menecment fakültəsinin dekanı iqtisadiyyat üzrə fəlsəfə doktoru Ceyhun Məmmədov kollektivin yeni əməkdaşları dekan müavini i.ü.f.d. Şəhriyar Muxtarovu və İqtisadiyyat və menecment kafedrasının koordinatoru i.ü.f.d Elvin Məmmədovu professor Hamlet İsaxanlıya təqdim edərək, onlar haqqında geniş məlumat verdi.

Professor Hamlet İsaxanalı öz növbəsində kollektivin yeni üzvlərinə Xəzər Universitetinin tarixi, inkişaf mərhələləri, beynəlxalq əlaqələri, təhsil müəssisəsində qazanılan uğurlar barədə məlumat verərək, universitetdə reallaşdırılan proqram və beynəlxalq layihələrdən danışdı. Görüşdə qarşıda duran vəzifələr, idarəetmə, elmi-tətqiqat fəaliyyətinin genişləndirilməsi, tədris və imtahan prosesinin təkmilləşdirilməsi, təhsilin keyfiyyətinin yaxşılaşdırılması, tələbələrin elmə olan marağının daha da artırılması üçün müxtəlif seminar və elmi konfransların keçirilməsi və digər məsələlər müzakirə edildi.