2017-ci il avqustun 9-da Moderator.az saytı Xəzər Universitetinin dünyanın 150 ən yaxşı gənc universiteti arasında Azərbaycandan yer alan yeganə universitet olması münasibətilə millət vəkili Vahid Əhmədovun təbrikini yerləşdirmişdir:

“Xəzər Universitetinin 53 ölkənin gənc universitetləri arasında ən yaxşı universitetlərdən biri kimi belə bir mötəbər nəticə qazanması, heç şübhəsiz ki, çox böyük uğurdur. Bu, həmin universitetin öz gücünü, imkanlarını beynəlxalq səviyyədə təsdiqləməsi, özünü dünya miqyaslı universitetlər sırasına qəbul etdirməsi deməkdir. Geniş anlamda isə bu uğur Xəzər Universiteti ilə yanaşı, həm də doğma Azərbaycanınımızın, onun təhsil sisteminin nailiyyətidir.

Mən bu münasibətlə həm sözügedən universitetin təsisçisi professor Hamlet İsaxanlını, həm də həmin universitetin dəyərli müəllim-tələbə kontingentini təbrik edir, onlara yeni uğurlar, nailiyyətlər arzulayıram. Hesab edirəm ki, Xəzər Universitetinin Azərbaycan təhsili adına ortaya qoyduğu bu nəticə ölkə prezidenti cənab İlham Əliyevin təhsilin inkişafına göstərdiyi müstəsna diqqət və qayğının nəticəsidir. Hansı ki, ölkəmizdəki bütün elmi müəssisələr, təhsil ocaqları, onların əməkdaşları daim bu diqqət və qayğını öz üzərlərində hiss edir.

Düşünürəm ki, Xəzər Universitetinin beynəlxalq QS reytinqində yer alması bütövlükdə Azərbaycan təhsilinin inklişaf dinamikasının təbliği, onun dünya təhsil sisteminə inteqrasiyası baxımından da mühüm addımdır. Xəzər Universitetinin bu uğuru ölkəmizin təhsil sisteminə marağı artıracaq, dünyanın ən müxtəlif dövlətlərindən universitetlərimizə tələbə axınını sürətləndirəcəkdir.

Mən bir daha bu böyük uğur münasibətilə Xəzər Universitetinin bütün kolektivini təbrik edir, onlara yeni-yeni uğurlar arzu edirəm. Arzu edirəm ki, Xəzər Universiteti bundan sonra da beynəlxalq reytinq cədvəllərində əldə etdiyi qabaqcıl yerlərlə bütün xalqımızı qürurlandırsın, bizlərə sevinc bəxş etsin”.

Xəbərin tam mətnini bu linkdə oxumaq olar: http://www.moderator.az/news/187535.html