2017-ci il iyulun 14-də Xəzər Universitetində elmi tədqiqat məsələlərinə həsr olumuş seminar keçirildi. Seminarda universitetin Biologiya departamentinin və Hüceyrə Patologiyası Tədqiqat Mərkəzinin müdiri Dr. İradə Xəlilova, departamentin müəllimləri dosent Cavid Ocaqi və Dr. Zaur Kərimov, İnkişaf Mərkəzinin direktoru Raziyə İsayeva, Təhsil departamentinin koordinatoru Qoşqar Məhərrəmov, Kitabxana - İnformasiya Mərkəzinin direktor müavini Aytac Misgərli, universitetin doktorant tələbələri iştirak edirdilər. Seminarının birinci hissəsində doktorantlar Züleyxa Əkbərova və Gülafət Şəfiyeva oxuduqları elmi məqalələrin tənqidi təhlillərini verdilər. Sonra doktarant Şəbnəm Şahgəldiyeva öz elmi mövzusu, mövzunun aktuallığı, qarşıya qoyulan məqsəd və gözlənilən nəticələr haqqında məlumat verdi. Təqdimatlar maraqla qarşılandı və hərtərəfli müzakirələr aparıldı.
Seminarının ikinci hissəsində elmi araşdırmaların gücləndirilməsi və elmi tədqiqat işlərinə dəstək yolları, Doktorant Tələbə Birliyinin (PhD Student Association ) yaradılması haqqında müzakirələr aparıldı. Sonda bu birliyin yaradılması haqda qərar qəbul edildi. Təhsil departamentinin koordinatoru və Türkiyənin Eskişehir Osmangazi Universiteti Təhsilin təşkili və idarə olunması üzrə doktorant tələbəsi Qoşqar Məhərrəmov yeni dərs ilindən bu birliyi könüllü olaraq təşkil etməyi öz öhdəsinə götürdü.
Qeyd olundu ki, Doktorant Tələbə Birliyi qənc tədqiqatçıların inkişafına kömək üçün yaradılan bir platformadır. Hər bir doktorant tələbə bu birliyə daxil ola və işində fəal iştirak edə bilər. Burada müxtəlif sahələrdən olan gənc tədqiqatçılar tələbə şəbəkəsi yaradaraq, öz ideya və təcrübələri haqqında fikir mübadiləsi apara bilər, müxtəlif görüşlər və seminarlar, həmçinin qeyri-rəsmi sosial tədbirlər təşkil edə bilərlər.