2017-ci il iyunun 29-da Xəzər Universitetində universitetin nəzdində fəaliyyət göstərən Avrasiya Bilik Mərkəzi (ABM), Xəzər Universiteti və ABŞ-ın Nyu - York şəhərində yerləşən Təbii Resursların İdarə Edilməsi İnstitutunun (TRİEİ) təşkilatçılığı ilə “Təbii resursların idarə edilməsi” mövzusunda başlanan beynəlxalq təlim iyulun 6-da Mərmər zalda keçirilmiş bağlanış mərasimi ilə işini başa çatdırdı. Təlimdə Azərbaycan, Ukrayna, Qırğızıstan, Qazaxıstan, Tacikistan və Monqolustandan mütəxəssislər iştirak edirdilər.

Mərasimi açan ABM-in direktoru professor İnqilab Əhmədov çıxış edərək, yeddi gün ərzində davam edən təlimin ilkin nəticələrindən və iştirakçı mütəxəssislər üçün səmərəli faydasından danışdı.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, İsveçrənin Azərbaycandakı fövqəladə və səlahiyyətli səfiri Filip Ştalder və TRİEİ-nin Avrasiya üzrə regional direktoru Qalib Əfəndiyev çıxış edərək, təlimi təbii resursların idarə edilməsi sahəsində yeni nəzəri və təcrübi biliklər aşılaması etibarilə yüksək qiymətləndirdilər.

İştirakçı mütəxəssislərə sertifikat təqdim olundu. Sertifikatları professor Hamlet İsaxanlı və səfir Filip Ştalder təqdim etdilər.

İştirakçılar adından Lesia Xomiak (Ukrayna) və digərləri çıxış edərək, təlimin yüksək səviyyədə təşkilinə görə təşkilatçılara təşəkkürlərini bildirdilər.

Bağlanış mərasimində Xəzər Universitetinin Kamera orkesti Azərbaycan və dünya bəstəkarlarının əsərlərindən ibarət konsert proqramı ilə çıxış etdi.