2017-ci il iyulun 3-də Xəzər Universitetinin Mərmər zalında “Təbii Resursların İdarə Edilməsi İndeksi-2017”-nin (Resource Governance Index) təqdimatı keçirildi. Universitetdə iyunun 29-dan etibarən davam edən “Təbii resursların idarə edilməsi” mövzusunda beynəlxalq təlim çərçivəsində keçirilən təqdimatda təlimin dinləyiciləri, Azərbaycan Respublikası Dövlət Neft Fondu, İsveçrə və Norveç səfirliklərinin nümayəndələri, qeyri-hökumət təşkilatlarının rəhbətləri və əməkdaşları iştirak edirdilər.
Tədbirdə Nyu - York şəhərində yerləşən Təbii Resursların İdarə Edilməsi İnstitutunun (TRİEİ) 81 neft, qaz, mədən sənayesi ölkələrinin, o cümlədən, Azərbaycanın vəziyyəti haqqında hazırladığı təbii resursların indeksi elan edildi.
TRİEİ-nin Avrasiya üzrə regional direktoru Qalib Əfəndiyev çıxış edərək, indeksin hesablama metodologiyasını ətraflı izah etdi və sualları cavablandırdı. Azərbaycandakı Norveç səfirinin birinci müavini Vegard G. Stensrud, İsveçrə səfirinin birinci müavini Simone Haeberli, TRİEİ-nin Monqolustan üzrə səlahiyyətli nümayəndəsi Dorjdari Namxaycansan və Xəzər Universiteti nəzdində fəaliyyət göstərən Avrasiya Bilik Mərkəzinin direktoru İnqilab Əhmədov öz olkələrindəki vəziyyət haqqında təqdimatla çıxış etdilər.
Tədbir mövzu ətrafında müzakirələr aparılması ilə başa çatdı.