2017-ci il mayın 13-də Xəzər Universitetində ilk dəfə keçirilən TEDxKhazarUniversity tədbirinin video çarxları artıq TED-in rəsmi Youtube kanalındadır. Bu tədbir 9 mütəxəssis-məruzəçinin çıxışından və Xəzər Universiteti tələbə və müəllimlərinin ifa etdiyi musiqi nömrələrindən ibarət olmuşdur. TEDx danışıqlarının ənənəsinə uyğun olaraq, məruzələr qısa, təsirli, ictimai hadisələrlə əlaqəli, ruh verən olmuş və yüzlərlə insanın bəyənisini toplamışdır.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı da məruzəçilər arasında idi və o, bir universitet xəyalının gerçəkliyə qovuşma hekayəsindən danışmışdır. Təhsil kimi siyasi yönü olan bir məsələnin 1991-ci ildə xəyalını qurmaq və onu gerçəkliyə qovuşdurmaq həqiqətən əzm, qərarlılıq, uzaqgörənlik və çalışqanlıq tələb edir. Hamlet müəllimin məruzəsi, digər 8 məruzə və musiqi performansı www.youtube.com saytında tedxkhazaruniversity adı ilə milyonların nəzərinə təqdim olunmuşdur.