2017-ci il iyunun 1-də Xəzər Universiteti “Universitet – məktəb əməkdaşlığı” layihəsi çərçivəsində 232 saylı məktəbin təşəbbüsü ilə Suraxanı rayon orta məktəblərinin 6-7-ci sinif şagirdləri arasında, hər biri 15 dəqiqə olmaqla, 3 turdan ibarət “Məntiq yarışması”nın final mərhələsi keçirildi. Yarışmada 232 saylı məktəbin şagirdləri ilə bərabər, 140, 85, 226, 284, 149 və 193 saylı məktəblərin müəllim və şagirdləri də iştirak edirdilər. Finalda hər birində 6 nəfər olmaqla, 7 məktəbin komandası yarışdı. Komandalara aid olduqları məktəblərin şagirdləri yarış boyu azarkeşlik edirdilər.

Xəzər Universitetinin əməkdaşlarından və Bakı Şəhəri Baş Təhsil İdarəsinin nümayəndəsindən ibarət 6 nəfərlik münsiflər heyəti cavabları qiymətləndirdi. Yekunda 149 saylı məktəbin komandası 1-ci yeri, 232 saylı məktəbin komandası 2-ci yeri, 85 saylı məktəbin komandası isə 3-cü yeri tutdu.

Tədbirin sonunda bütün yarış iştirakçılarına sertifikatlar, ilk üç yeri tutan komandalara isə diplom və medallar təqdim olundu. 1-ci yeri tutan məktəbin komandası kubokla da təltif edildi. Bundan əlavə, Xəzər Universiteti və Bakı Şəhər Baş Təhsil İdarəsi tərəfindən yarışda iştirak edən şagirdlərə hədiyyələr paylandı.

Tədbiri yekun sözü ilə bitirən Xəzər Universitetinin təsisçisi, Direktorlar və Qəyyumlar Şurasnın sədri professor Hamlet İsaxanlı 232 saylı məktəbin direktoru Məhluqə xanım Əzizovaya universitet-məktəb əməkdaşlığında göstərdiyi təşəbbüsünə görə təşəkkürnamə təqdim etdi.

Yarış ərzində, fasilələrdə Xəzər Universitetinin tələbə və müəllimlərdən ibarət qrupu musiqi və rəqs nömrələri göstərdilər.

Sonda xatirə şəkli çəkildi.