2017-ci il mayın 24-də İqtisadiyyat və menecment fakültəsinin birinci kurs tələbələri Yaponiya mövzusuna aid açıq dərsdə iştirak etdilər. “Yaponiya: Gündoğan ölkə” adlandırılan açıq dərs tələbələr tərəfindən təklif kimi irəli sürülmüşdü və Xəzər Universitetinin ingilis dili müəllimi Səadət Fərhadovanın rəhbərliyi altında, Xəzər Universitetinin Beynəlxalq Əlaqələr Şöbəsi və Yaponiyanın Azərbaycandakı səfirliyinin dəstəyi ilə həyata keçirildi.

Açıq dərs Yaponiyanın tarixi, iqtisadiyyatı, adət-ənənələri və mədəniyyətinin müxtəlif aspektləri haqqında təqdimatlardan, eləcə də tələbələrin çıxışlarından və nümayişlərindən ibarət idi. Yaponiyanın Azərbaycandakı səfirliyi tərəfindən tələbələr üçün yapon ənənəvi geyimləri, mədəni əşyaları, plakat və digər maddi mədəniyyət abidələri təqdim olunmuşdu.

Açıq dərs hər iki ölkənin dövlət himnləri ilə başladı. Sonra açıq dərsdə Fidan Karaxmazlı, Narınc Məmmədrzayeva və Emil Cəfərov Yaponiya tarixindən qısaca danışdılar. Onlar ölkənin keçmiş və müasir dövrləri haqqında məlumat verdilər.

Xəzər Universitetinin iranlı tələbəsi Mehdi Nuri və Səbinə Arifzadə Yaponiyanın zəngin mədəniyyəti haqqında təqdimat etdilər. Təqdimat Yaponiyanın mətbəxi, ənənələri və diqər mövzular haqqında idi. Ənənəvi geyşa libasını geyinmiş Səbinə Arifzadə geyşa rəqsını ifa etdı və bu rəqs haqqında məlumat verdi. Səbinə və Mehdi çubuqların köməyi ilə necə yemək yeməyi nümayış etdilər.

Elvin Camalzadə, Anar Qasımov və Fatimə Əsədova Yaponiyada təhsil sistemi haqqında təqdimatlar etdilər. Qısa qəhvə fasiləsindən sonra Fərhad İbrahimli, İbrahim Hacıyev və Aida Bayramova Yaponiyanın iqtisadiyyatı, Azərbaycan və Yaponiya münasibətləri mövzularında təqdimatla çıxış etdilər.

Rəhimə Məmmədova, Şamxal Dadaşov və Kənan Orucov tədqiqat, innovasiya və Yaponiyanın texnoloji avansları haqqında təqdimatlar ilə çıxış etdilər.

Tələbələr acıq dərs ideyası haqqında danışdılar: “Sadə dərs günlərinin birində ağlımıza yeni bir fikir gəldi .Niyə də inkişaf etmiş dünya ölkələrindən biri haqqında araşdırmalar aparmayaq? Daha sonra isə yeni ideyalar bir-birinin ardınca gəlməyə başladı. Əvvəlcə qərar verdik ki, o axtardığımız nümunəvi xalq özünəməxsus mədəniyyəti və üslubu olan yaponlardır. Daha sonra isə onu müxtəlif aspektlərdən öyrənməyi qərara aldıq. Bizim araşdırmalarımız təkcə internetdən məlumat toplamaqla sonlanmadı, çünki bu, bizə Yaponiya kimi bir ölkəni tanımaq üçün kifayət etməzdi.

İngilis dili müəllimi Səadət Fərhadova və Beynəlxalq Münasibətlər Ofisinin köməyi sayəsində Bakıda Yaponiya səfirliyinə  ziyarət üçün biz tələbə heyəti yaratdıq. Yaponiya səfirliyi bizi suvenirlər, kitablar, ənənəvi geyimlər ilə təmin etmişdilər. Biz harmoniya  və həyəcan ilə dolu olan sehirli Yaponiya dünyasına daxil olduq.

Mayın 24-də Xəzər Universitetinin Nizami korpusunda Yaponiyaya – “Gündoğan ölkə”yə həsr olunmuş açıq dərs həqiqətən də müvəffəqiyyətlə baş tutdu. Xəzər Universitetinin akademik mühit bu tətbir üçün əlverişli idi. Biz başa düşdük ki, bir “Xəzər”li kimi bu mədəniyyəti öyrənmək, onu təbliğ etmək, Azərbaycan-Yaponiya münasibətlərinə, cüzi də olsa, öz töhfəmizi vermək bu tamamilə düzgün bir seçim idi. Yapon mədəni irs və köklü iqtisadiyyatına həsr olunmuş tədbirimizin “Xəzər” və yapon universitetləri arasında tələbə mübadiləsinə təkan verəcəyinə inanırıq.